In tuamhlawm ṭha sehlacu ka damsuak ding nan – Actor Rahul Vohra

Kum 35 mi India Lemcangthiam hminthang, Youtuber Rahul Vohra cu Covid – 19 nat nei in May 9 ah a thi.

A thih hlan te ih a zuk ta mi video tawi cun mipi lung a tham zetih a fan tamzet cun Rahul thih thu ah India cozah le an tuamhlawmnak Delhi Siizung an vuihram.

Khawpkham ih Oxygen hiip ding neilo in thawsam phah, caurau zetih a zuk ta mi video ahcun “tufang ah nungdam thei dingin ka hrangah oxygen a thupituk. Oxygen hiip ding umlocun kan caurau ih voilekhatah kan besia. Siizung hnaṭuan pawl kan ko nan an ra thei lo. Nazi 1-2 rei hnu lawngah an ra suak ṭheu. An rat hlan sung hmuahhmuah cu har zetin mahten talbuai ṭul” a ti.

May 8 khalah a nung dam ding a zumlo thu, Indian Prime Minister Narendra Modi tag telin Facebook cahmai ah ca a ngan ih “ṭhiṭhaten in tuamhlawm sehlacu ka nung dam ding nan sikhawh. Tuahcun thazaang khal ka nei nawn lo” a ti.

Anupi Tiwari Vohra khalin Siizung lam tlaksamnak ruangah a pasal Rahul a thi mi a si thu Instagram ah a tarlang.

A pasal thih hlan te ih a zuk ta mi video caption ah “Ka Rahul in inthihsan ti cu zo cio khalih theih zo mi a si. Nan, ziangtin a thi, ziangruangah a thi ti hi zo hman in an thei lo” ti`n a ngan ih “hivekhi si` Siizung ih in tuamhlawm dan cu. Hivekih thi mi Rahul dang um nawn hlah seh” tiih a ngan hnu ah #justiceforirahulvohra tiah a ngan.

Rahul Vohra le Tiwari te nupa cu tuhlan thla 6 ih innsang din an siih an neiawknak kum 1 hman kim hlan ah innsangpa in Covid nat thawn mual a liam san a si.

Atufang India ram cu Covid ṭumhnihnak pianhmang thleng nathrik in a nuai lai fang a si ih mina an tamtuk ruangah Siizung umnak ding le Oxygen hiip ding an daihaw nawn lo.

Covid ṭumkhatnak a deem deuh hnu in cozah lam an thlahdahaw ruangah Covid ṭumhnihnak a thok veten mina thar le mithi cu vansang ah an kai.

Cuvek dinhmun sicingin rampi pursum lam tlasiatsin phangin rampumhuap lockdown an tuah duhlo ruangah Siivailam thiamsang le rampicang hruaitu ṭhenkhat in nasaten India cozah an soisel a si.

Tudinhmun ah India ram ah Covid natnei 22.7 million an kim ih 246K mithi le 18.7 million damsal an um a si.

Leave a Reply

Your email address will not be published. Required fields are marked *