Hmuhsuam zuamtaihnak phunphun pahtlangin Dungthluntu 70 million neizotu Nu ropi

Atufang leitlunhuap ih milar Australia ram mi Alex Hirschi cu harsatnak phunphun pahtlangin internet cahmai ih dungthluntu 70 million lenglo a nei zo hlei ah, video pakhat a thlah mi hin $ tingteel a la lut.

Amahhi mawṭaw cangkang ngainazettu a si ih mawṭaw khawvel ah phumaw dingin radio thuphung hnaṭuan a ban san.

Leitlunhuap ram tinkim ih mawṭaw cangkang thu pawl zirzoi in mawṭaw ṭhat zia, a mawi zia le mawṭaw cangkang tuahtu thu pawl pholangin social media ah “Supercar Blondie” timi hmin thawn a lar mi a si.

“Nangmah vek ih Lar ve dingin ziangtin Ke kan kar ding tiah mi nih in sut ṭheu. Miṭhen cun ka pho lang mi mawṭaw cangkang zaar ah olsamte`i Lar mi ah in ruat. Nan, ziangvek lamzin ka zawh, ziangvek harsatnak pawl ka pahtlang tivek in ruat sak tel lo” tiah Alex Hirschi cun a rel.

Pumcawmnak radio thuphuan bang san in, mawṭaw khawvel ih a lut pekte ah harsatnak phunphun a tuar.

“Mawṭaw cangkang ngaihsaktu mi zate deuh thaw cu mipa hlir an si ih, mawṭaw thawn pehparmi puaipi tivek a um tikah a telvetu nunau um sun cu kei mah lawng ka si ṭheu. Ka dunglam ihsin in rel supso ih, nunau fafa ih hivek ah telve tiphungpha in hnon ka tuar caan a tam. Mawṭaw thuhla ka theih lomi a tam bet tikah company picang rori hman in hmuhsuamawknak aw-aan in barh” tiah amahcun a rel bet hrih.

Mi ih ziang siar lo mi si cingin a tumruhnak in Lam a hruai ih, atu ahcun social media ih viewer ngahbiktu dinhmun tiang a thleng ban zo a si.

“A caan ahcun tuvek dinhmun tiang ka thleng thei mi hin i mangbangter. Ka ruah ban lo mi Leitlun mi hminthang pawl in cumi mawṭaw kha na mawng sin zo maw, ziang vek a si, ka mawṭaw thar hi rak zoh ve aw ti`n cakuat ka dong tam. Cuvek caan ah ka manglam a si lo maw ti`n mah le mah ka sik awk ṭheu” tiah Alex Hirschi cun a ti.

Teimak suahin kum 1 ah ni 300 sung rori ram dangdang ah tlawngin hna a ṭuan ruangah, a liamzo kum 2 hrawng ah lungbuai caurau in a rak um dah.

“Ka innsang, ka rualṭha le ka uite tiang tong man caan nei loin hna ka ṭuan ruangah caurau in ka um lawk. Nan, pulhnatpi boruak ah colhhahdam in ka um thei saal. Cumi tikcucaan sungah hnaṭuan bawmtuding kan ngaih tuah ih, atu ahcun hnaṭuanpi 25 kan nei ih hahdam deuhin hna kan ṭuan thei” tiah amahcun a rel.

Kum 36 mi Alex Hirschi (Supercar Blondie) teimaknak cu a rahsuak taktak ih, atu ah YouTube channel ah 7.5 million subscribers, Facebook ah 45 million, Instagram 9.9 million ti`n dungthluntu 70 million lenglo a nei.

The-Sun ih tarlang mivek a si le Alex Hirschi (Supercar Blondie) net worth cu $17 million a si.

Leave a Reply

Your email address will not be published. Required fields are marked *