Hmaikhuh bun lo cawhkuanter ruangah Palik zung Meisa hri an chat sak

India, Rudraprayag district, electricity department ih hnaṭuan mi pahnih in Kotwali police station le District Judge umnak inn ih electric hri an chat sak ruangah an hnaṭuannak ihsin an cawlhter sung.

Palik pawl in khuasung mipi pawl, Covid 19 boruak ih thlundingmi Daan an thlun maw, thlun lo ceknak an nei lai ah electric zung hnaṭuan mi pahnih cu mask bun lo in bike an to lai an hmu ruangah an kaai ih cawh an kuan ter.

Electric zung ih hnaṭuan pahnih cun hmanhmawh zetih tuahṭulmi pawihei kan nei ruangah hmaikhuh kan bun man lomi a si an ti nan palik pawl in paisa 100 veve an kuan ter thotho. Cumi ruangah an pahnih in an lungawi loih cawhkuan tertu palik zung ih meisa hri an chat sak.

Meisa hri an chat nak palik zung cu district Judge umnak inn khal a si cih ruangah meisa mit nak san, electric zung lam ah an sut cih ih, electric zung lam ṭuanvo neitu pawl in zingzoinak an nei hnu ah hri a cat mi an hmu suak.

Palik zung lam in thuhla umdaan an thei ciang veten electric zung bawi hnen ah an report ruangah meisa hri chattu mi pahnih cu hnaṭuan ihsin an cawlhter sung a si.

ref:news18

Leave a Reply

Your email address will not be published. Required fields are marked *