Hmaikhuh bun fial ruangah Bus driver an Thawi That

French, Bayonne khua ih bus driver Philippe monguillot (kum 59) cu bus passenger pawl ih thawinak ruangah siizung ah a um ih, a nat celh loin tlawngkaai ni 5 ah a thi.

Covid – 19 karhzai lonak dingih cozahpi daan suahmi thlun dingin bus passenger pawl a fial hai mi cu mipahnih in an el ruangah buainak a suak ih kut thlakawknak tiang a thleng mi a si.

An thawi na tuk ruangah an buainak hmun ih emergency service pawl an thleng ah bus driver cu nikhua theilo in a rak um zo.

Alu an thawinak a besia deuh ruangah a thluak a thi ih nikhua thei loin a um. Ruahsanding a um nawnlo tin doctor pawl in a sungkhat pawl an sim hnu ah sianglo cing ten a nunnak an liamter a si.

Nupi le fa 3 nei zo a siih a fanu in “kan neih mi hmuahhmuah a cemraal ṭheh. Mithli tlak ding khal a tang nawn lo” a ti.

Mithi tu` rualpi pakhat cun, “miṭha zet a siih, hnaṭuan a teimak fawn. Khawtlang harhdamnak hrang ruatin hmaikhuh bun dingih fial ruangah le ticket check tum men ruangih hivek thil a thleng hi cu a dik theilo a si. Cozah lam khalin bus driver safety hrang a ngaihtuahṭul a si” tiin a sim.

Hih buainak ruangah French, Bayonne khawsung bus mawngtu pawl in bus mawng duh loin duhphorhnak an nei. Kut thlaktu pawl daan vekih adikmi thuṭhen saknak nei dingin le bus driver pawl ih safety hrang a ṭuldan vekih tawlrelnak nei dingin cozah hnenah duh an phorh.

Bus driver Philippe monguillot kutthlaktu 2 cu mithattum case, an thawi lai hmutu minung 2 cu kham thei na cing mi kham duhlo case, mi pakhat cu an sual a si timi thei cingin pheh saktum case tiin minung 5 an kaai a si.

ref:TOI

Leave a Reply

Your email address will not be published. Required fields are marked *