Hivek natnei cu Pfizer COVID 19 vaccine dawt lo dingin MHRA in Thuthannak a nei

BioNTech/Pfizer company tuahmi Covid 19 vaccine Sii dawt ruangih harsatnak tongtu an um ruangah UK ram ih Medicines and Healthcare Products Regulatory Agency (MHRA) cun Siidawt ralring dingin ramsung Siizung ṭuanvonei pawl hnen ah thuthannak a nei.

UK ram ah December 8 ihsin tlangzarhthok a si mi Covid 19 vaccine dawt ruangah National Health Service member pahnih cu an taksa a thling ciamco.

“An pahnih hi thilphun tamzet allergic nei an si. Curuangah thil pakhatkhat ruangih an taksa tivek a thling ciamco a si le reh lohli dingin dawtaw dingmi adrenaline auto-injector thawn thluahaw ringring mi an si.”

“Curuangah Medicines and Healthcare products Regulatory Agency (MHRA) cun vaccine, Sii vai dangdang, ei-in rawl allergic nei luar le adrenaline auto-injector thluahaw ṭul khawp ih allergic nei pawl cu Pfizer/BioNTech vaccine dawtlo dingin ralrinnak thu an than mi a si” tiah Siizung ih ṭuanvonei mipakhat in The Sun media hnen ah a sim.

“Cuhleiah cuvek ruangih taksa thling, taksa vual tivek rehlohliternak facilities cu BioNTech/Pfizer Covid 19 vaccine dawtnak hmuntinkim ah ret tengteng a ṭul ih cuvek facilities umnak hmun lawngah Sii dawt ding a si tiah thuthannak an nei” ti`n Siizung ih ṭuanvonei mipakhat cun a sim hrih a si.

Pfizer-BioNTech tuah mi Covid 19 vaccine cu UK ram ih Sii vai thiamsang pawl in zohciangnak an nei hnu ah a him a si ti`n an pom ruangah December 8 zingpit in UK ramsung tlangzarhnak an nei.

Covid 19 vaccine cu kum upa enkolcawp ṭul care home ih um pawl le a kilkhawitu staff pawl hrang ah tawlrel hmaisabik a siih a sangtu ah kum 80 luan kum upa le health care staff pawl hrang ah an tawlrel a si.

Covid 19 dokhamsii cu voihnih dawt ih dawt dingmi a siih hmaisabik ah doses 800,000 tlangzarhnak an nei. Hmaizarh sung khalah tuṭum ai ih tam vaccine cu UK ram hrang ah an cah bet tiah Media ṭhenkhat cun an tarlang a si.

Leave a Reply

Your email address will not be published. Required fields are marked *