Himivek na hmu veten Cozah hnen ah Report lohli Aw

US ramsung hmun tamzet ah China ram address ngan mi, bawmte (package) dongtu an tam zet ih, hivek bawm a dongtu pawl cu an mai umnak kiangkap naibik, cozah hnen ah sim thei tengteng dingin US cozah in a phuang.

Bawmte par ahcun China, Suzhou address a nganaw ih US ram mi tamzet in an mailbox sung pawl ah an hmu a si.

Bawmte leng in zoh ahcun hnakhaih, zunghruk vek deuh in a lang nan a sung ah ziang a si ti thei lomi ThilCii a um.

Virginia, Washington State, Arizona, Indiana, Louisiana le Texas ummi pawl in an dong tam ih, US ramsung States 15 ih cozah pawl in mipi hnen ah ralring dingin le an dong mi Thlaicii khal Tuh lo dingin thu a than.

United States Department of Agriculture cun, “Tutiang, ziangbik a si ti khal kan thei ciang lo. Bumawnak khal a si thei. Nan thei dah lo mi Thilcii nan dong le Tuh hrimhrim hlah uh” ti`n mipi hnen ah thu a than.

United States Department of Agriculture, Department of Homeland Security le federal agencies pawl in bawmte sung ih a tel mi Thlaicii, a kuattu thuhla pawl zingzoinak an nei rero lai ih bawmte a dongtu hmuahhmuah in onglo dingin le ong pang a si khalle a sung ih Thlaicii Tuh lo dingin mipi hnen ah thu a than.

Thlaicii bawm dong mi thuhla ah US cozah in China cozah hnen ah thusutnak a nei nan China cozah in an ngan mi address a lem a si thu le zingzoinak nei ve dingin an dongmi bawm sample cu an ram ah kuat ve dingin a dil.

Kan dung zarhpi sun khal ah Nashville, Philadelphia, Cincinnati, Tampa le Minneapolis ummi pawl in Thlaicii bawm an dong tamzet thu theih a siih, a dongtu pawl cu United States Department of Agriculture in “mailbox ah package dongtu nan um a si le a zamrang thei bikin state’s plant regulatory official lole plant health director simthei uh la a sung khal ong hlah uh. Ṭuanvo neitu pawl in an ra lak hlan lo rak ret ṭha uh” tiah mipi ralrinnak a pek a si.

ref:USDA

Leave a Reply

Your email address will not be published. Required fields are marked *