Hand sinitizer in ruangah Minung 7 Nunnak Cem, Mipahnih Nikhua theiloin Siizung thleng

Russia, Tattinsky district, Tomtor khuami minung 9 cun riit duh in Hand sinitizer an in ruangah mi pasarih an thi.

November 19 zaan ih nuam ceen party tuahtu minung 9 cun zu in ding nei nawn lo ah methyl alcohol zaṭek 69 tel mi antiseptic hand sinitizer cu riit duh sin in an in ruangah mi 7 an thi ih mipahnih cu nikhua thei lo in Siizung ah tuamhlawm in an um.

Antiseptic hand snitiser intu minung 9 lakah kum 41 mi nunau pakhat le kum 27,59 mi mipa pahnih cu hand snitizer an in hnu reilote ah an nunnak a cem ih nungdam miparuk cu Yakutsk khuapi Siizungpi ah tuamhlawm lohli dingin Vanzam thawn an phur.

Siizung ih tuamhlawm mi miparuk lak ih kum 28, 32 le kum 69 mi mipathum cu Tlawngkai ninga ni ah an nunnak a cem ih, tuisun khalah mipakhat a nunnak a cem.

Hih thuthawn pehpar in Federal public health watchdog Rospotrebnadzor report ngan mi ah “Tur in ruangih thihhlohnak thubuai ti`n ngan khum a si zo. Antiseptic hand snitizer in ruangah mi pasarih thi in mipahnih cu nikhua thei lo in Siizung an thleng” tiah an ngan.

Covid 19 pulhpi in leitlun a nuai thok in ram tamzet cun mah le ram cio ih natkarhzai cuangnak hmunram pawl ah lockdown tuah cio a si ih zung, dawr, Tlawng tvk khal phit ter thluh a si.

Cumi boruak lai ah Zu dawr pawl khal phitter thluh an si ih Zu in zongsang tamzet in harsatnak an tong. Zu in ṭhenkhat cun Lockdown laifang cu caan ṭha ah hmangin Zu an hmei lan. Supawtheilo pawl cun zu lei ding um lo ah hand sinitizer cu rii dingin an in ciamco ruangah Tur ciah tuar ih nunnak cem an tamzet a si.

Leave a Reply

Your email address will not be published. Required fields are marked *