‘Ghost of Kyiv’ raldo vanzam cun Ukraine mipi Lung thoter

Ralthuam phunphun thawn Ukraine ram luhcilh a si hnu ah ramsung mipi theih duh bik pakhat cu Russia lam tuar nat thu hi a si ih, atufang online ih lar zet Russia vanzam 6 kap thlaktu ‘Ghost of Kyiv’ raldo vanzam cun mipi Lung a thoter.

‘Ghost of Kyiv’ a zam lai zuknungtawi cu atufang internet cahmai ah a lar zet ih, miṭhen cun vanzam mawngtu pilot hi Leitlun ralpi voihnihnak hnu ih vanzam mawng turubik a si ding tiah an rel.

Atufang boruak thawn Russia vanzam 6 a kap thlak timi cu namhnget theih a si hrih lo nan, ramsung thusuak le online ih video thlah darh mi cun Ukraine mipi Lung a thoter zet ih, “hivek ih kan cangvai thei cun kan hrang ruahsanding a tam” ti`n ramsungum pawl thazang an pe aw.

Siarbet : Ukraine cozahpi ṭan ṭhat a la, kum 18 ihsin 60 karlak ramleng suak a kham

Ukraine President Volodymyr Zelenskyy in martial law a phuang zo bangin, Ukraine’s state border guard service (DPSA) cun kum 18 ihsin kum 60 karlak mipa pawl cu ramleng suak a kham.

“Martial law a nung sung cu Ukraine rammi mipa kum 18-60 cin cu ramleng suak kham an si sung thu, ramri kiltu DPSA in a phuang zo. Himi thusuah hi ngai poimawh dingin thu than a si zo” tiah interior ministry zung in Telegram ah thu a than.

Martial law an phuang cu ralkap hruaitu pawl in ramsung thuneihnak an kai sung tinak a si ih cumi thusuah ngaipoimawhlotu/pahbaltu cu ralkap thu ah a ṭhum aw.

Hitiih miṭhenkhat rampi suahsan an kham nak san cu “Ukraine rampi humkhamnak hrang hmalaknak pakhat a si” tiah DPSA cun thu an suah.

President khalin rampi humvennak hrang ṭanla duhtu rammi hmuahhmuah hmai ah suak dingin le hriamkai duhtu cu kaiter an si ding thu a phuang zo hlei ah, “Ukrainian passport kaitu zaten ralkap ah nan lut thei” ti`n defence minister, Oleksiy Reznikov in a rel ve.

Tlawngkai ningazing ih Ukraine interior ministry in Telegram ih a tarlang mivek a si le, Ukraine ralkap kut tuarin Russia ralkap 30 lenglo an that zo ti a si. Cuihtlunah raldonak mawṭaw le tank 130 hrawng an siat sak zo thu le fighter 5, helicopters 6 an siat sak zo thu Telegram ah a tarlang.

“Mizaan ah kan ralkap pawl in ziangvek kan si timi, kan ral pawl an hmuh zo. Ukraine mipi hmakhua hrang ruatin kan ralkap pawl in kum 8 lenglo ral an do zo. Atucu kan ram humkham dingin a ti thei hmuahhmuah hriam kai caan a si. Ralkap bawm men lawng siloin Ukraine ral hmuahhmuah thianfai vuairi caan a si” ti`n Telegram thusuahmi ah an ngan tel ih “pengṭhen zate le Kyiv khawpi kan thuam ding” tiah an tarlang.

Tuṭum doawknak cu Ukraine rammi hmuahhmuah ṭan la an tum ih ramleng ih um mitamzet khal rampi hum dingin an tlung rero zo. Kum 8 sung, Donbas ih raldotu ralkap colhlazo 300,000 lenglo khal hriamkai dingin an tiamkam zo.

Atu ca kan ngan tiangah Ukraine President Volodymyr Zelenskyy in ram sung um mi 100 luan an thi zo thu le hriam tuar 300 luan an um thu a phuang a si.

Leave a Reply

Your email address will not be published. Required fields are marked *