Georgia Guidestones : Lungphun bomb thawn an puah siat

America’s Stonehenge tikhalih theih lar Georgia Guidestones lungphun cu July 6 zing khawvang hlan ah bomb thawn an puah siat.

Lungphun siatsuahtu zo an si ti theih a si lo ih, kiangkap naivai ih um khawmi pawl in zingpit khawvang hlan ah Lungphun kiangkap hrawngin puakkuai thawm ring zet an thei thu, palik hnen ah an sim.

Elbert County Sheriff palikzung ih ṭuanvonei mipakhat in caankhiah bomb thawn an puah mi siding zum a um thu a rel ih, Georgia Bureau of Investigations thawn hnaṭuantlang in zirzoinak kan nei vivo ding tiah media hnen ah a sim.

Puakkuainak hin Lungphun pakhat a ti kek kuai thluh ih a dang khal siatsuah ngah mi a um. Remṭhatsal nakding ah cemliam a tam ding zum a um thu, amahcun a rel bet hrih.

Georgia Guidestones

US ram, Georgia peng, Elberton saklam peng 8 hlat hrawng ih um Georgia Guidestones hi Kum 1980 ih phun mi a si ih, leitlunhuap mipi ngaih sak hlawh zet thil danglam pakhat a si.

Asancu Lung an phun thok dan a danglam zet hlei ah tuni tiang a par ih ca ngan mi fiangfai in a san let theitu an um lo.

Lung an phun thok dan cu Georgia Guidestones thawn pehparmi website pawl ah hitin an tarlang.

“Kum 1979 ah Elbert Granite Finishing Company Inc. president Joe Fendley cu hnipuan fai zet hruhtu mipakhat in a tong. Amahcun Pathian ṭihzahtu mirang buurkhat aiawhtu Robert C. Christian ka si a ti aw ih “Georgia khawleng ih um kan si. Santhar mipi hnen ah thu cah ta kan duh” a ti.”

“Fendley thawn an tongaw hnu ah Granite City Bank ah paisa buuk dingin a feh ih, cuih hmun ah Wyatt C. Martin timi mipakhat thawn an tongaw”.

“Robert C. Christian tiawtu cun Martin hnen ah tumtahmi le an group thu a sim ih “tuhlan kum 20 hrawngin khawkhannak kan nei cia mi a si a ti.”

“Cun, an group thu cu midang theih an duh lo thu a rel hlei ah ka hmin taktak cu Robert Christian a si lo a ti ih “kan zumnak thawn milawmi Christian hmin kan hril hrim mi a si” a ti.”

“Martin hnen ah zohman sim lo dingin thu a tiamter hnu ah a hmin taktak le a thuhla cipciar a sim. Lungphun project an thok hlan ah an thuhla zirzoi thei dingin thucipciar a sim cia mi a si ih, tuni tiang amah Martin baak lo cu a thuhla theitu an um ding zum a um lo.”

“Amahcun Lungphun cu Nazi, calendar le compass bangih hman theih dingin le siatralnak teilo dingin phun sak a duh thu a rel.”

“Kum 1980, March 22 ah mipi 100-400 hmai ah an ong ih Lungphun tuahtertu cun netahnu ah Elbert County hnen ah a ap leh sal.”

Lungphun cangan mi pawl

Lungpi 6 hman a si ih a tung in 5, tlunlam ah pakhat ti`n a um ih, Lung par ih ca an kher mi ah English, Spanish, Russian, Chinese, Arabic, Hebrew, Hindi, Swahili le khuahlan ṭong phun 4 an hmang.

Canganmi cu

1. Maintain humanity under 500,000,000 in perpetual balance with nature.

2. Guide reproduction wisely — improving fitness and diversity.

3. Unite humanity with a living new language.

4. Rule passion — faith — tradition — and all things with tempered reason.

5. Protect people and nations with fair laws and just courts.

6. Let all nations rule internally resolving external disputes in a world court.

7. Avoid petty laws and useless officials.

8. Balance personal rights with social duties.

9. Prize truth — beauty — love — seeking harmony with the infinite.

10. Be not a cancer on the Earth — Leave room for nature — Leave room for nature.

Georgia Guidestones hi conspiracy theories zumtu pawl cun Setan hnaṭuannak, Setan thucah a si ti`n an pom ih tuhlan ah siatsuah an rak tum rero zo.

Lungpar ah catisen thawn cangan an malh dah zo ih tuṭum bomb puak khal hi cupawl cangvaihnak a si thei ti`n zumnak a um a si.

Georgia Guidestones thu cipciar na siar duh le tanglam ah hmet …..

Leave a Reply

Your email address will not be published. Required fields are marked *