Finland ram ah cu Hitin an rannung an Hum

Finland : Kum tinten, motor accident nakih thi mi, zukneng 4000 hrawng an um ih cuih accident ruangah kum tin, paisa 15 million Euros hrawng a cem liam ṭheu.

Cuvek bahkhawnnak le rannung thi mi demdeuh dingin Finland cozah cun ruahnak thar pakhat a nei. Cumicu, khawthimlak khal ah meisa tleu thawn cerhngah a sile a tleu thei mi rong thuhnak a si.

Cuih rong cu zukneng kii ah an thuh ih, zaan thim lakah motor mit/tleu in a cerh a si le a kii vang mi cu hmun hla khalin an hmu thei ih bahkhawnnak a dem phah thluh.

Zukneng kii ih rong thuhnak cu 2014 hrawng ihsin an rak hmang thok zo mi a siih Reindeer Herders Association chairwoman Anne Ollila cun, “traffic accident demdeuh ding duhsan in kan tuah mi a si. Athok ah cu an taksa ah rong kan thuh nan a kii sawn hi hmun hla khalin hmu a ol ruangah hitin kan tuah saalnak a si” ti`n Finland media YLE hnen ah a rak sim dah.

Leitlun ram ṭhenkhat ahcu an rannung pawl an ngaihven zetih Russia khal ah zukneng track nak app pakhat an tuah. Cuih app a hmangtu pawl cu khual an tlawng suksonak lamtluan ah zukneng an um pang asile ralring dingin cuih app cun a sim a si.

Cuih app cun rannung nunnak a himter hlei ah bahkhawnnak a demter zet a si.

Leave a Reply

Your email address will not be published. Required fields are marked *