Fala zuk Like pek mi thu ah Vatican in zingzoinak a nei

7.4 million follower neitu Pope Francis official instagram account thawn taw lang ṭheh zik, Brazil model zuk “like” a pekaw mi thu thawn pehpar in Vatican in zingzoinak a nei tiah Catholic daily newspaper in a tarlang.

Pope Francis instagram account (@franciscus) cu miburkhat ih ṭuanvolak mi a siih zobikin Brazil model Natalia Garibotto zuk cu like a pe timi an thei ciang lo nan Holy See Church jurisdiction sung ih um mi mipakhatkhat in like a pek mi a si ti cu an thei ciang a si.

Cui zuk cu 2.5 million follower neitu Brazil model Natalia Garibotto in October 5 ah a post mi a siih Pope Francis instagram account in “like” a pe mi cu November ni 13 tiang a lang nan a thaizing ah a unlike awksal.

Hih thuthawn pehpar in Rome hrambun Catholic daily newspaper La Croix editor Robert Mickens cun “Pope Francis cu US President Donald Trump vekin computer le phone thawn thluahaw ih ca post hmang a si lo”.

“Atuahmi cu account ṭuanvoneitu pawl ih post ding mi kha approve a tuah. Like pek le peklo ding tivekah a nih in a theihpi lo. Aṭultuk caan bak lo ah ca/zuk a thlah dah lo. Curuangah tu ṭum ih model zuk like pek mi thuhla khal hi a mah thawn bulpak in pehzomawnak a nei lo. Communication department pawl sawn an si” a ti.

Pope Francis account hin 7.4 million follower a nei nan follow mi zo hman a nei lo. Follow mi neilo ciangin ziangah sexy zet mi zuk a feed ah a lang thiam timi hi an theithiamlo ruangah Vatican cun Instagram hnen ah thusutnak a nei tiah Catholic daily newspaper in a ngan a si.

Leave a Reply

Your email address will not be published. Required fields are marked *