Facebook in Covid 19 thawn pehpar mi thuthang diklo a darh ter tam bik – ICFJ

Columbia University ih zirzoinak neitu International Center for Journalists (ICFJ) le Tow Center for Digital Journalism pawlkom cun Covid 19 boruak ah Facebook in thuthang diklo a darh ter tambik tiah an phuang ih a sangtu ah politician le Cozah ṭuanvonei pawl an si ti`n an tarlang.

Journalism and COVID-19 timi thulu thawn April 2020 ihsin zirzoinak an nei mi a si ih Twitter, Youtube le Google khal in thuthang diklo an darh ter ve ti`n an tarlang.

Research tuah nak ah US, UK, India, Nigeria le Brazil Journalists pawl an tel ih an mah lak ih zaṭek 66 cun Covid 19 thawn pehpar mi thuthang diklo suaknak hrampi cu Facebook a si ti`n an tarlang.

Research nak ih Journalists zaṭek 82% pawl cun Covid 19 thawn pehpar in Facebook, WhatsApp le Instagram ih thuthang diklo a suak mi pawl cu Facebook hnen ah report nak an nei ih report tu Journalist hrek hrawng cun Facebook lam in an let sal dan lungkim um lo zet ti a si.

Hih thuthawn pehpar in survey tuahnak ih telvetu India Journalist pakhat cun, “Facebook in thuthang diklo a darh ter nasatuk ka ti nak san bik cu April thla ih an share mi website pakhat ruangah a si. Cuih website cun Covid 19 thawn pehpar mi thuthang diklo a thlah ih Facebook ṭuanvoneitu lam in thei cing in an delete duh lo. Website share mi thuthang diklo cu Covid 19 a karh ciamco thok lam April thla khat sung lawng ah minung billion hrek in an rak zoh man a si” a ti.

Facebook sungṭuan lak khal ah Facebook nei tu pai` hnaṭuan dan lungkim lotu an tam vivo. Hnaṭuan sang hlawhṭhazet cingin Facebook policies lungkimpilo ruangih Facebook company suahsantu khal an um phahphah zo. Hitler in Israel miphun a rualrual ih a rak that dah mi thu (Holocaust) khal ah Facebook sungṭuan lakah hmuhawthiamlonak a suak.

Holocaust a rak um ngaingai lo. Thuphan phuahcawp menmi a si ti`h aupitu pawl ih ca thlah mi pawl cu Facebook Lu lam in a dik lo ti thei cingin an post mi cu an rak hlawn sak duh lo. Cumi thu ah Facebook sungṭuan lak ah hmuhawthiamlonak nasaten a suak.

Cutiih buainak a suak hnu lawng ah Facebook neitu Zuckerberg cun Holocaust a rak cang ngaingai lo titu pawl ih ca post mi kan hlawn sak thlang ding ti`n tuzarh October thla sung lawng ah a phuang lai a si.

Hram:TheGuardian,TheVerge,IT

Leave a Reply

Your email address will not be published. Required fields are marked *