Fa 22 nei tei` Innsang in an don mi Christmas laksawng an phorh cu ……

British ramsung ih innsungsang mipum tambik “Radford family” cun Christmas laksawng an dong mi pawl an phorhsuak cu an innsung ah a khat thluh.

Fate 22 neizotu innsang nu Sue Radford hoha in Christmas laksawng an donmi phorhsuaknak an nei lai video cu December 27 ah youtube ah an thlah ih a zohtu ting 1 le hrek kimzik an um zo.

Innsungsang rual an si vekin mi ngaihven an hlawh zetih Innsangpa Noel Radford le a nupi Sue Radford cu “fa le hizatzat fingkhawi thei cu mi turu tak an si” ti`n porh an hlawh zet.

Fa le ngaihven zettu nu le pa an si ih Christmas tinten an fale hrang ah Christmas laksawng lei nak dingah £5k lenglo an cheng ṭheu.

“Tu kum khal kumdang vekin kan fale laksawng peknak ah £5k lenglo kan cem liam. Christmas ni rawl ei khawm ding hrang ah nihnih sung kan bazaar ih kan ei-in ding le kan christmas laksawng pawl cu innsung ah a khat thluh” tiah innsangnu Sue in a ti.

Innsangpa Noel in “Christmas Eve ihsin timlamnak kan nei thok ih zarhkhat sung hna har ṭuan vek rorin kan taksa in a thei.”

“Kan innsang ei-in hrang cu zarhkhat ah £300 hrawng kan cemliam ṭheu. Asinan Christmas hrang ahcu a let rorin sumsaw a cem khal a si men thei. Nan, cemliam zat khal kan ruat man lo.”

“Rawlkilnak mipum 16 tlem cabuai sau le mi paruk tlem cabuai te cu ei le in a khat thluh. Kan fa le laksawng kan pek mi thawn innpi sung cu ke retnak khal a um lo” a ti.

Radford family cu kum 2012 ih “15 Kids and Counting” documentary Tv programme ruangah leitlun huap in an hmin a thang thok ih British ramsung ih innsungsang tumbik/tambik ti`h theihlar an si.

Mirang khawsadaan vekin kut an sih hlan ah fa an nei hmasa. Fa hmaisabik an nei lai ah Innteknu Sue cu kum 14 a si ih a pasal Radford Noel cu kum 18 mi a si. Setember 1992 kum ah kutsihnak an nei ih, tu ah Morecambe khua ah an um.

Kum 1993 in kum tin deuh thaw nau an nei ih tui` ni tiang pafa 11 fanu 11 an si. Kum 2014 ih an fa 17 nak, dam khuasuak lo pumsung ih naute Alfie Thomas siar lo cu tui` ni tiang an nungdam lai a si.

Faraday tikhalih theih lar Radford Pie Company neitu an si ih, fa netabik an nei cu tukum, 2020 April 3 ah a si.

Leave a Reply

Your email address will not be published. Required fields are marked *

error: hahahahahaha !!