Donald Trump ih Ca thlah mi Facebook in hlon sak, Twitter in phit sak

Covid 19 thawn pehpar mi thuthang diklo ti`n Facebook le Twitter cun US President Donald Trump ih social media ca thlah mi ah hmalaknak an nei.

Tubaite ih Covid 19 nat kai US President Donald Trump ih ca thlah mi in Covid 19 le tlangrai damlonak cu bangaw deuh vek in a langter ruangah hmalaknak kan nei mi a si tiah Facebook ih ṭuanvonei mi pakhat in Reuters hnen ah a sim.

Donald Trump in cuih ca cu Facebook le Twitter ah a thlah ih voi 26,000 share sawngtu an um hnu ah Facebook in a delete ih Twitter company lam khalin Share sawng ngah lo dingin hmalaknak a nei.

U.S. Centers for Disease Control and Prevention report ah kum 2019-2020 karlak, US ramsung tlangrai ruang ih thi minung 22000 an um ti a siih, 2020 kum thok lam ihsin US ramsung Covid 19 ruangih thi mipum 210,000 thawn tah ṭhim cun an bangaw lo zia a lang ciang tuk ruangah tuvekin Facebook le Twitter in hmalaknak an nei mi a si.

Pu Trump hin tuhlan khalah ciang zet ih khih hmuh ding um lo mi a rak aupi dah ih “nauhak ah Covid 19 nat a kai thei lo deuh thaw” tiih a ṭong mi video cu August thla ah Facebook in a rak hlon sak dah zo a si.

Leave a Reply

Your email address will not be published. Required fields are marked *