Donald Trump cu March 4 ah US President a ṭuan sal ding an ti

Conspiracy zumnak fehpitu QAnon thluntu pawl in 2021, March 4 ah Donald Trump cu US rampi hruaitu dik dinhmun in a tharin voi 19 nak US president a ṭuan sal ding tiah an aupi.

Kum 2020, US rampi hrilawk nakah an duhdan zawngin thil a cangsuak theilo ruangah tuvekin ruahnak dangdai suahpi in an au lala a si.

Cukhalcu an mai` lairel khuakhaannak ih phorhsuakmi zumnak/ruahnak siloin sovereign citizen movement tiih kohmi mibur pakhat ih zumnak an ṭawmpimi a si.

Cuih zumnak cu ca in siseh, document xerox copy in siseh QAnon tlanlennak social network Gab le Telegram ah nasaten an pho lang.

Sovereign Citizen Movement
An nih hi US cozahpi in ralhraang ṭihnung cangvaihnak pakhat vekih a zoh mi mibur an si. An zumnak hrampi pakhat cu US Daanhrampi 1871 act hin US rampi cu corporation kut sung ah a thlenter an ti.

Curuangah cuih kum hnu ih US President hriltlin thar hmuahhmuah cu (voi 19 nak US rampi President Rutherford B. Hayes telin) US rampi President dik ah an pom duh lo hlei ah US Daanhrampi ih Uk mi ah kan telve lo an ti. Cuihtlun ah 1933 kum ah President Franklin D. Roosevelt in Gold Standard timi Ukawdan a titawp ih, cumi ai ah US mipi cu foreign investor pawl hnen ah a zuar thluh tiah an zum.

QAnon in March nili thleng ding an hngakhlap
An nih hi a dik lomi le rin tlak loih ruahmi hram mumal neilo, politic lam luan tuk ih phiarsawmnak rin dan (far-right conspiracy theory) suahpitu an si.

Liberal Hollywood lemcangthiam le Democratic politician pawl cu setan biak an si ih nonal nunsau dingin nauhak thisen an in ringring tiah zumnak an nei.

Cuihtlunah Leitlunhuap nauhak zuarnak (nupa sinak hmanpi le an sa ei dingin) pawlkom lakih telve an si tiah zumnak an nei ih cupawl cun Pu Trump an phiarsawm ti`n an zum.

Cuih setan biak pawl ih phiarsawmnak cu January 20 ihsin US President ṭuan pehzom tuding Pu Trump in a neh neknek leh ding tiah zumnak an rak nei.

Asinan, tuah, an rak aupimi pawl cu Pu Trump a tlasia ruangah a takin cangsuak theiloding dinhmun ah a um. An rak aupimi cangsuak thei ding cun Pu Trump hi President ah an canter a ṭul. Curuangah an zumnak cangsuak thei dingin sovereign citizen movement zumnak an ṭawmpi a si.

QAnon zumnak thluntu website pakhat cun “Kan zumnak a hngetkhoh ṭul. Biden hi kan President dik a si lo. Pu Trump cawlh sungah a langten tohkhamsang ah a to sung men mi a si. Kum 1871 ihsin an rak herkualmi US rampi Ukawknak cu March 4 ah a tawp ding. March 4 ah US President voi 18 nak a simi Ulysses S. Grant hnaṭuan pehzom in Donald Trump in Voi 19 nak US President a ṭuan ding a si” tiah an tarlang.

“QAnon le sovereign citizen movement hi an fehpi mi zumnak a bangawmi khal a um ko. Nan, tuikum January thla hrawng hin QAnon thluntu tamzet cun sovereign citizen movement ruahnak an ṭawmpi thok” tiah conspiracy theory researcher Travis View in a sim. (Calettu – NHS)

Leave a Reply

Your email address will not be published. Required fields are marked *

error: hahahahahaha !!