Djoser Pyramid ah Kum 2500 hrawng rei zo mi ThlanKuang 100 luan hmusuak bet

Giza pyramids thawn peng 10 hrawng hlatnak ih um Djoser Pyramid, Saqqara mual ah mithi kuang (sarcophagi) 100 luan hmuhsuah a si thu, Egypt antiquities ministry in a phuang.

Covid 19 ruangih tlaksiatnak tung ding sal tum in Egypt ram ih tourist hiplut ding tumtahnak thawn Saqqara mual an lai ciamco ih September thla khal ah kum 2,500 hrawng reizo siding zum um mi mithi kuang tamzet an phorhsuak zo.

Phorhsuah thar mi mithi kuang lak ih rong phunkim thawn cei in seal pit mi mithi kuang ṭhenkhat cu pyramid of Djoser hmai ih buuk sak mi sungah an pho lang.

Phorhsuah mi mithi kuang ah tuhlan kum 2500 luan hrawng ih puithiam mummies le official bawi rank sang pawl ih bungrua pawl khal hmuhsuah cih a siih mithi hmaikhuh le Thing thawn tuah mi Saqqara pathian nui` zuklem 40 khal a tel cih ti`n tuanvoneitu pawl cun media hnen ah an sim.

Hih thu thawn pehpar in antiquities minister Khaled El-Anany cun “meter 12 hrawng thuk mi a rualrual ih mithi phum nak hmun 3 ta a si ih kum 2020 sung ih hmuhsuahnak ropibik a si. Hih hmun ih kan hmuhsuah mi pawl cu Saqqara ih a ropi zet mi thuthup zaṭek 1 fang lawng a si lai. Hih hmun kiangkap khal hi Thlaan ropi le a rualrual ih mithi phum nak khur ropi hliar an si” a ti.

Tu ih hmuhsuah mi mithiphumnak Djoser pyramid tel in Saqqara ah pyramids 13 a um ih, 2018 kum khal ah hih hmun ah 4,400 Kum hrawng rei zo mi puithiam Wahtye ih Thlaan ropi an hmusuak dah.

Egypt ram cu Kum 2011 le 2013 ih ramsung buainak ruangah a tlasia zet ih cumi ihsin an tung ding aw ṭan fangah Covid 19 boruak in a man lala. Tu ah cuih tlaksiatnak lak ihsin an tung ding aw tum sal ih, hih Thlaan ropi hmuhsuah mi hin an ram ah tourist tamzet a hiplut an beisei a si.

Leave a Reply

Your email address will not be published. Required fields are marked *

error: hahahahahaha !!