Delhi ih Chinmi dinhmun ṭumsuklam pan

India ramsung ih Chin raltlan tambik umnak Delhi khualipi ah Covid a karh cak zet ih Chinmi lak khalah nat nei hnih-thum an um thlang tikah dinhmun ṭumsuk zetin khuasa cio an si.

“Kan dung baite ah kan unau Hakha mi pacang no pakhat in Covid nat thawn mual in liam san zo. Tuizing khalah Chin raltlan tamzet umnak C1 ih um Mizo thlangval in Covid nat thawn mual in liam san lala” tiah Falam community hotu upa pakhat in FOM hnen ah a sim.

Delhi ih Chin raltlan umtambiknak veng cu Vikaspuri, Hastsal, Janakpuri, C1-JeevanPark-Sitapuri veng pawl an si ih veng tin ah Chin raltlan Covid nat nei hnih-thum an um.

“Falam pacangno pakhat khal tu ah besia in um. Oxygen hiip ṭul dinhmun a si ih Oxygen le duh vekin hawl a theih lo. Cun, Siizung umnak ding khal ni 2 sung kan hawl zo nan kan hmu thei lo. Ambulance khal hawl hmuh a har zet. Km 18 hrawng hlatnak Safdarjung ih private siizung Ambulance um sun kan biak thei ih cumi thawn DDU siizung lam ah beidong in an pan tum tawp” tiah Falam community hruaitu upa pakhat cun a sim hrih.

Delhi um Mizo pawl khal Covid boruak ah harsatnak tong ve

“Chin community hruaitu ṭhenkhat in Covid mina hrang hmalak danding beisei in Mizoram house lam in pehtlaih nan kan nih lam khal mahte buai in kan rak buai ve ih phone thawn biakaw baaklo cu ti theih dang kan nei lo.”

“C1 ih um Covid mina besia pahnih khal SPUNER (Delhi Police – Special Police Unit for North East Region) ṭuanvonei rori in Siizung umnakding ni 2 sung an buaipi nan an ngah thei ve lo. Siizung ihkhun lawng a um sun khalle Oxygen um lo tivek hlir an si” tiah Delhi, Mizoram house ih ṭuanvonei mipakhat in FOM hnen ah a sim.

Covid boruak ah Chin raltlan harsat tuar dan bangaw lo

Delhi ih um Chin raltlan tamsawn cu innbiteekti ih um an si ih innsungsang mipakhat in Covid nat a nei tikah enkol danding a har zet. Nica hawlh ih ei-bar fang dinhmun in sumsaw harsatnak le ṭonglam harsatnak ruang khalah harsatnak tumzet an tong.

Siizung ngah theilo cu taanta hrih in Vai ṭong thiam le Delhi um rei ṭhenkhat cu Siizung lam ah mahte an tawlrelaw thei. Ṭong thiamlo le Siizung lam thleng dahlo cu community hruitu pawl ih buaipiṭul an si tikah thuah hnin-thum in harsatnak an tong.

Atufang Delhi dinhmun

Covid natnei an pung cak tukih Delhi khuasung lawngah minute 4 dan in Covid mina an thi. Siizung umnakding le Oxygen haidaihlo ruangah Covid mina an thi cupco.

Mithi urnak ding khal daih aw loin hnaṭuantu khal an daih aw lo. Mithi tamzet cu urkaang dingin a tlar in an bawh ih miruak pakhat urkaang dingah nazi 3-4 sung hngak a ṭul. Urkaang tik khalah mah le sungkhat cio cangvaih a ṭul.

Delhi ih hmun tamzet ah mithi urnakding hmunram an daihaw loih cawp le cilh in Park tamzet sungah Covid mina ur nakding an tawlrel.

Zing-Sun-Zaan tiloin mithi ur ding an um ih mithi ur rim cu veng tin deuh thaw ah a nam thluh.

Hivek dinhmun a si ruangah UK, US le ramdangdang in Covid mina tuamhlawmnakding hmanrua, Oxygen ceet tivek hlu in Delhi an ṭanpi nan tuhrih tiangah mina thar le mithi a mah keel te a si hrih.

April thla lai hrawngin Covid mina an pung zutzo ruangah zarhkhat sung Lockdown nei dingin cozah in thuthannak a nei lawk nan nikhat pumhlum zawngin natnei tlalam pan ti a um lo ruangah May thla tiang Lockdown tuah dingin Delhi cozah in thu a suah.

Tudinhmun ah Delhi ah Covid mina 1.07 million hmuhsuah a si zo ih damsal 959k le mithi 15,009 an um zo.

India rampumhuap ih Covid case cu 18 million a thleng ban ih mithi 201k le damsal 14.8 million an um a si.

Leave a Reply

Your email address will not be published. Required fields are marked *