Delhi palik ih Siichauk Kg 160 kaih mi cu report ah Kg 1 lawng a tang

Siichauk kg 160 kai tu Delhi palik 4 cun Kg 1 lawng kai in report an ngan ih a dang an zuar ṭheh ruangah mual an pho ih hnaṭuan in cawlh ter sung an si.

Jahangirnagar police station ih sub-inspector 2 le constable lubik 2 an si ih September 11 ah Siichauk zuar nak inn siim in a zuartu Anil le Siichauk Kg 160 an kai.

“Siichauk zuartu in nawhthuh 1.5 lakh (2660140 kyat) a pe hai ih an thlah sal” tiah palik report ca ah a um.

Nawhthuh laak mi lawngah hanṭuan ban theih a si ih, Siichauk kg 159 zuar thup in Kg 1 lawng kai ngah vekin report an ngan ruangah an pa 4 in hnaṭuan ihsin an cawlh ter lawk tiah HT times cun a ngan.

Tulai hi Siichauk (rittheih) thuhla ah Bollywood khawlvel a buai zet ih India hmuntinkim ah Siichauk thawn pehpar mi thuhla hmuahhmuah cu palik in zingzoinak nasaten an nei.

Tu kum June 14 ah Bollywood actor Sushant Singh Rajput cu a umnak Mumbai, Bandra ah a thlai aw that. Hivek dinhmun thlengter tu cu a fala hlun Rhea Chakraborty a si. Siichauk lole ritthei thilri a pe ringring ruangah a si ti`n thu a um ih cu nu khal cu, Mumbai palik in an kai lawk.

Amah thawn pehzawmawnak neitu Bollywood khawvel ih a rualpi, nuam ceen in party a hmang pi mi tivek tiang zingzoinak an nei ih WhatsApp thawn an biak aw nak message pawl khal Times now news channel in a phorh suak thluh.

Cuih message ruangah leitlun level ih hminthang Bollywood arsi Deepika Padukone, Shraddha Kapoor le Sara Ali Khan te pawl cu India Narcotics Control Bureau in zung ah ko in thusutnak an nei.

Cuvek dinhmun a si ruangah Delhi palik 4 thuhla khal phorh suak thluh a si ih hivek thuhla thawn pehpar aw mi hmuahhmuah cu kan phorhsuak thluh ding ti`n Delhi palik in thu an suah.

Leave a Reply

Your email address will not be published. Required fields are marked *