Covid 19 vaccine tuahtu SII company innpi a kang

Leitlun Vaccine suahnak company tumbik a simi Serum Institute of India innpi cu January 21, zaanlam ah a kang ih, tu ah miruak 5 an phorhsuak zo.

Serum Institute of India cu Pune ih um a siih atufang tlangzarh thokmi AstraZeneca le Oxford University tuah Covid 19 vaccine “Covidsheild” suah rerotu an si.

Innkang thokdan hi an thei ciah lo nan Covid 19 vaccine tuah zamrang thei dingih an sak rero lai mi innpi ihsin a kang thok mi siding an zum.

Pune Mayor Murlidhar Mohol cun “Meisa kan phal thei zo. Inn sak rero lai mi lakin miruak 5 kan phorhsuak” tiah ramsung media hnen ah asim.

SII CEO Adar Poonawalla khalin vanduinak a suak mi cu poi a ti zet thu le mithi cu inn thar saknak ih hnaṭuan pawl an si ding a zum thu ramsung media hnen ah a sim ih thihhloh tong innsang pawl kan riahsia pizet a ti.

Adar Poonawalla cun innkang ruangah Covid vaccine an tuah mi a siatral phah lo thu khal twitter ah a tarlang ih sunralmi thilri man cu kan thei hrih lo a ti.

Leave a Reply

Your email address will not be published. Required fields are marked *