Covid 19 vaccine dawt hmaisabiktu in a tuar mi Side Effect rel suak

US hrambun Siivai company Pfizer le Germany hrambun BioNTech company ṭuan tlang nakih hmuhsuah mi Covid 19 dokhamsii cu zaṭek 90% rorin hmual a nei tiah company ṭuanvonei pawl cun November 9 ah an phuang.

Cuih sii cu a ṭha maw ṭhalo voihnih an test suak zo ih netabik test nak phase 3 cu US, Germany, Brazil, Argentina, South Africa le Turkey ram mi mipum 43,500 luan hmang in test nak an nei hnu ah 90% rorin hmual a nei timi an hmusuak a si.

Himi ah mipi ih thei duh zet mi Covid 19 dokhamsii dawt ruangih suak mi side effect cu Austin, Texas mi Glenn Deshields in simfiahnak a nei.

Amah hi kum 44 mi a siih Covid 19 vaccine test nak ih siidawt volunteer pakhat a si. Amah cun “Sii in dawt hnu ih side effect pakhat ka theih hmaisabik cu zuri pendawng vek ih ka um mi hi a si. Asinan cuih natnak pawl cu a hlo lohli” a ti.

US, Missouri ih um Siidawt volunteer Carrie (kum 45) khal in a hmuh tonmi a sim ve ih “flu vaccine side effect thawn an bangaw zik. Avoikhatnak, September thla ih in dawt ṭum ah Lu na taksaa, ruang pumpi na le tha na in ka um lawk nan ni malte ah a reh lohli sal. October thla ih voihnihnak in dawt cu hmaisa ṭum ai in ka tuar na sawn. Asinan cuvek side effect um hman sehla tulai leitlunpi ih kan ṭul bik mi Sii a si vekin ziangkim ka tuar ngam ko” a ti.

Covid 19 dokhamsii cu U.S. Food and Drug Administration hnen ih suah sian nak an ngah hnu lawng ah company lam in an suah thei lai dingih an tumtah dan ahcun tukum kum cem lam ah million 50, Kum 2021 kum cem lam ah billion 1.3 ti`n voihnih suah dingin an tuah tum a si. (Dailymail)

Leave a Reply

Your email address will not be published. Required fields are marked *