Covid 19 Vaccine Dawt Hlan/Hnu ih Na theih tengteng ṭulmi thil Phun 12

Ram ṭhenkhat ah Covid 19 vaccine an dawt thok thok thlang ih Sii dawt hlan/hnu ih theih ṭulmi tete le Sii kan dawt tikah ziangvek in kan um thei timi pawl cu ca siartu hrang ah kan run tarlang ding.

Na Covo na ngah ding caan kha thinsauten hngak aw
Mitamsawn cun kan hmanhmawh caan ah thil kan tuahsual ṭheu. Curuangah Covid 19 vaccine na dawt caan kimding tikcu kha thinsauten hngak aw. Dawt lohli thei ve dingin na hmanhmawh le na cangsual thei. US, UK le ramdangdang ah Covid 19 vaccine dawt lohli beisei ruangih Covid Sii lem dawt ngahtu an tam. Cucu an hmanhmawhtuk ruangah bum an tuar mi a si. Cuvek dinhmun thlenglo dingin na dawt caan kimding ni kha thinsauten hngak aw la harhdam zung lam ih Aw-aan kha ngai aw.

Asilo lam zawngin Covid vaccine thu a leng mi khan sidawt lo ti hreh hlah seh
Social media san a si vekin Covid 19 thu le vaccine thawn pehpar mi thuthang phunphun online ah hmuh ding a tam.

Online thuthang in na ruahnak a lo ti vaivuan le nangmahten zirzoinak nei aw. Covid 19 vaccine thawn pehpar mi thuthang ngantu rinsantlak pawlkom tamzet an um.

Cupawl lakih rinsantlak pakhat cu US Centers for Disease Control and Prevention hi a si. An website ah lut aw la nangmahten na diraim ko zingzoinak neiaw. (Myanmar hrang ahcun
MINISTRY OF HEALTH AND SPORTS hi rinsantlak an si)

Covid-19 nat na rak kai dah khalle vaccine dawt thotho aw
Nat kai zo pawl khal nathrik an kai sal thei thotho. Curuangah Covid nat na rak kai dah a si khalle vaccine na dawt tengteng ṭul.

Hminsin : Damlo lai ih Monoclonal antibodies lole plasma thuntu cun treatment nei hnu ni 90 tal hngak hrih a ṭul tiah CDC in an phuang. Curuangah vaccine na dawt hlan ah na doctor kha ron ta tengteng aw.

Covid mina le rinhleh mina cun vaccine dawt lo ding
Covid nat na kai ih nat pianhmang a lang lai a si le vaccine dawt hrih hlah. Cuvek ṭhiamṭhiam in rinhleh mina khal dawt lo ding tiah mithiam pawl in an sim.

Thlahnih-thum tiang Nat pianhmang a lang khalle dawt thotho aw
Covid na negative hnu, thlakhat-hnih luan tiang nat pianhmang (taksa na, lu na tvk) a lang khalle vaccine dawt thotho aw. Cuvek nat painhmang pawl cu virus nung a um lai ruangih a suak mi a si lo. Virus hmual sawn a si tiah mithiam pawl in an sim.

Ni 14 sung sidang dawt hlah
Covid vaccine na dawt hnu ni 14 sung sii dang zianghman dawt hlah. Acangthei ahcun dose 2 nak nadawt hlan cu sii dang dawt lo lawlaw a ṭha bik.

Allergies na nei le Siibawi sim tengteng aw
Covid vaccine lawng siloin vaccine hrimhrim huatu an um. Curuangah na taksa le vaccine an milaw maw! milawlo timi kha siibawi hnen ah sim tengteng aw. Taksa thawn Vaccine milawlo luar pawl cu dawt lo a ṭhabik tiah mithiam pawl in an sim.

Siidawt ṭheh veten tlung cih lo ding
Vaccine dawt ṭheh veten tlung cih lo ding. Minute 15 – 30 tal hngak ta ding. Nataksa thawn a milawlo le an lo tuamhlawm thei lohli ding.

Kan thei dingmi pakhat cu vaccine side effect (lu na, khawsik, nuamsamlo, taksa na, luaksuak tvk) hi an tuar tlangpi.

Cun, Vaccine dawt ṭheh in cawlhhahdam a ṭha. India ram ih Covidsheild dawttu tleirawl pakhat cu an dawt hnu zaan lam ah hna a ṭuan cih ih thawsam in a thi. Doctor pawl cun vaccine side effect a tuar thawn hna a ṭuan ruangah si ding an zum.

Vaccine ih zirin dose hnihnak dawt aw
Covid vaccine cu voihnih dawt dingih tuahmi a si. Voikhat lawng dawtmi cun hna a ṭuan ṭha famkimlo. Curuangah voihnihnak khal dawt tengteng ding asi.

Pfizer-BioNTech tuahmi vaccine cu ni 21 dan in a voihnihnak an dawt. Moderna le Covidsheild cu ni 28 dan ih dawt ding a si.

Nikhiah kim hlan ah dose 2 nak dawt hrimhrim lo ding. Dawt remcanglo ruangih nikhat-hnih tlai ih dawt cu a poi hran nak a um lo ti`n mithiam pawl in an sim.

Natchawk ei a theih maw?
Sii dawt hlan ahcun natchawk ei cia lo dingin mi thiam pawl in an sim. Nan, Sii dawt hnu nuamsam lemlo ahcun Antipyretic a simi ibuprofen, paracetamol lole acetaminophen tivek ei a theih ko.

Sii kan dawt hnu ah ziangtin???
Mitinkim in Covid 19 vaccine an dawt thluh lo ruangah kan dawt zo a si khalle a keel te in Covid boruak ih thlun ṭul mi daan tete kan thlun hrih ṭul lai tiah mithaim pawl in an sim.

Covid 19 vaccine dawt ṭheh hnu ih an tuar ṭheumi
Sii dawtnak a na, a thling a sen, Lu na, taksa ṭhawp, tha ze, umdan nuam lo, thakthak, luzing, thlan suak tam, kua song, rawl ei cak lo, luakluak tvk

Hminsin : Himi ca hi US Centers for Disease Control and Prevention website in 2021, January 25 ih a update mi zohṭhim in ngan mi a si.

Leave a Reply

Your email address will not be published. Required fields are marked *