Covid 19 Suar 3 nak in Delhi Khualipi a nuai thok

Covid 19 case thar a mal vivo tiin ruahsannak tumpi thawn khua kan sa lai ah Delhi khualipi cu Covid 19 nat in a nuai thok tum lala ih Chief Minister Arvind Kejriwal in “Covid 19 third wave” tiih koh theih a si a ti.

November ni 3 lawng ah Delhi khuasung ah Covid 19 case thar 6700 hmuhsuah a si ih tuhlan ih hmuh suah mi case hlun pawl thawn Covid 19 mina ting 4 luan an um zo a si.

CM Arvind Kejriwal cun “kan dung, ni mal lai hrawng khan Covid 19 case thar a pung zutzi ih Covid 19 suarthumnak tiah kan ko thei” ti`n reporter hnen ah a sim ih “Asinan, thinphan ding a um lo. Cozah lam in mitṭheplo rorin a hnung kan zul ih a ṭul dan ih zir in dokham ding kan man ṭhepṭhep” a ti.

November 14 ah India ram ih puai pibik pakhat a si mi Diwali puai hman ding a si ruangah mipi lam cun thlaphannak malte an nei.

Covid 19 dokham sii hi ziangtik ah a suak ding timi theih cian a si hrih lo ruangah tu dinhmun ih Covid 19 dokham thei dan um sun cu healthcare facilities ṭhazet nei hi a si.

Cozah lam khal in covid 19 mina tuamhlawm danding le healthcare facilities hi number 1 ah ret in hmalaknak an nei rero. Delhi khuasung ih itkhun le Covid 19 dokhamnak hmarua tlasam mi private siizungpi pawl khal ah a ṭul mi pawl thunlut dingin Delhi cozah le Supreme Court ṭuan tlang in hmalaknak an nei rero a si.

CM Arvind Kejriwal cun, “Delhi khuasung ih Covid 19 suak pek ihsin mina 403k, damsal 360k le mithi 6652 an um. Case thar a mal vivo kan ti lai ah voilekhat in mina an pung sal lala ih mipi lam khalin ralring fimkhur zet ih kan um a ṭul” a ti.

Tudinhmun ah India rampi huap in Covid 19 mina 8.36 million an um zo ih mi thi 124k an kim zo a si.

Leave a Reply

Your email address will not be published. Required fields are marked *

error: hahahahahaha !!