Covid 19 natnak in dam zo nan a side effect tuarlaitu Bryan Cranston ann-ka

Leitlunhuap Covid 19 nat a darh thok in tuini tiangah nat nei mipum 67 million an um zo ih minung 1.54 million mual an liam zo a si.

Covid 19 nat nei ih thi minung tamsawn cu kum upa lam le damlonak neicia an si. Nat dang neilo hrisel zet nan Covid 19 ruangih thi khal an um nan, cuvekcu an mal zet. Nat nei ih damsal khal 43.1 million lenglo an um.

Covid 19 nat nei nan damsal mipum 43.1 million an um thuthawn pehpar in miṭhen cun an damsal lohli ko timi ruahnak thawn damlo phang hran lemlo ih khuasa an um.

Covid 19 natnak ihsin dam zo nan a effect tuarlaitu Breaking Bad star Bryan Cranston cun cuvek ih daithlang zetih um pawl hrang ah Covid 19 effect a tuar mi pawl cu The Ellen DeGeneres Show ah mipi hnen ah simtheinak a nei.

March thla hrawng ahkhan Bryan Cranston te nupa cun Covid 19 nat an kai ih zarhkhat sung taksa hluahhlo, Luna, taksa na, tha cem in an um. Covid 19 nat pianhmang a simi thil rim, thil thawtnak khal thei lo in an khawsa.

Cranston cun “March thla thok hrawng ah a si. Tom Hanks te nupa in nat an nei lai hrawng ah khan kan nupa in nat kan nei ve. Asinan celeb dang pawl vekin mipi kan thei ter lo.”

“Zarhkhat sung kan tuar nasa cuang ih taksa na, tha cem, taksa hluahhlo, mallai khuh khuh in kan um ih caan tawkmawi in tuamhlawm hnu ah ka dam sal”

“Nat ka kai pek ihsin thil thawtnak le thil rim theilo in ka um. Sii le vai thawn in tuamhlawm zar ah ka damsal nan Covid 19 nat pianhmang a simi thilrim theihlonak cu tuini tiang ka tuar lai” a ti.

Amah cun “Thil rim theihnak hi zaṭek 75 hrawng ka nei sal in ka thei. Asinan mi pakhat in coka ah coffee suang bang seh la ka vung lut ah a rim zianghman ka thei theilo. Thilrim theilonak hi ziangtiktiang in awh ding ti sim theih a si lo ih kum khua in cu a silo hram ka beisei” a ti.

Tu ah, Covid 19 cu Leitlunhuap in a karhzai sinsin ih a dokhamsii a suak thei a si khalle olai in a hlo hrih lo ding tiah mithiam pawl cun an sim. Bryan Cranston vekin damsalzo nan tuini tiang thilrimtheihnak nei thei hrihlo an pung vivo.

Curuangah mithiam pawl cun Covid 19 hi ziangah siar lo ih um men lo dingin mipi hnen ah simtheinak an nei ringring ih kan ram kan khua him thei dingin mipakhat cio in ṭuanvo kan nei tiah an au ringring a si.

Leave a Reply

Your email address will not be published. Required fields are marked *