Covid 19 Nathrik rim Theithiam Dingin Ui Fim an zirh suak

Uico, an fim zia le mithiam pawl ih training mi phei cu, ṭangkai zetmi minung bawmtu ah an suak thei ti cu mitlangpi theih mi a si.

Rampi cozah, ralkap pawl khalin an sor ṭangkai zetih boom, meithal, thilpuakthei le riittheihsii rim lawng si lo in cancer natnak ṭhenkhat, malaria le nat cii dangdang rim theithiam dingih zirhmi ui fim khal an um ih, tukhalah, Germanay, University of Veterinary Medicine Hanover mifim pawl in coronavirus nat neitu ciil rim le midam ciil rim theithiam dingin Uico an zirh suak thei.

Ui fim, thil rim hnim thiam uico 8 pawl cu Covid – 19 mina le midam ciil, kan taksa ihsin suak mi taksathliing hmangin an zir ter ih zarhhnih sungah zaṭek 94% rorin an hlawhtling a si.

Biochemistry of infections thiamsang, zir nakih telvetu Professor Maren von Köckritz-Blickwede cun “kan damlo tikah kan taksa sungih suakmi thilthliing, ciil tivek rim pawl khal a thlengaw thluh. Cumi rim in uico in a theithiam siding” a ti.

“Abik in tui` kan zir suak mi cu ram harsa, Covid 19 nat test nak bungrua harsanak hmun pawl ah a ṭangkai zet ding. Nat kaaitu pawl cu uico in an rim a thei dingih a ṭuldan vekin ṭuanvo neitu pawl in hmalaknak an nei thei lohli ding” tiah Professor cun a sim hrih.

Asinan tui` an zirmi cu ṭihnung nawn lomi, minung par ih kaai thei lo dingih rem cia mi nathrik hmang in an zir mi a si ih, atak ih hmansuah thei dingin Covid 19 nathrik nung mi hmang in zirnak an nei lai ding.

Cuhleiah, Ui fim pawl cu Covid 19 nat neitu le nat dang neitu rim thleidang thiam ding khalin an zirhtum a si.

ref:livescience,reddit

Leave a Reply

Your email address will not be published. Required fields are marked *