Covid 19 nathrik kaai an um ruangah Mink rannung 92,700 Urthat tum

Spain, Aragon region ih zuat mi rannung “mink” 100,000 kimzikte cu Covid 19 positive an si ruangah an that thluh tum thu harhdamzung ṭuanvo neitu in an phuang.

An zuatnak hmun ih hnaṭuan mipum 7 pawl par ih Covid 19 nathrik an hmu hnu ah, rannung an zuat mi pawl khal Covid 19 test nak an nei ih, mink zaṭek 87% pawl in coronavirus an kaai vemi an hmusuak ruangah nathrik karhzai sinding phang in, an that thluh tummi a si.

Hih thu thawn pehpar in W H O cun, “himi hmuan ih hnaṭuantu hnen ihsin nathrik an kaai mi siding zum a um. Asinan, rannung ihsin minung hnen ah covid 19 nathrik an suan thei maw ticu kan zir rero lai a si” an ti.

Mink 92,000 hnakihtam rorin Covid 19 nathrik an kaai ruangah nathrik karhzaitersin in minung tiang an suan thei pang ding an phan ruangah, tuvekin an that ṭheh tumnak a si thu khal Aragon Agriculture Minister Joaquin Olona in a sim.

May thla khalah Netherland ram ih Mink zuatnak hmun hnih ah Covid 19 nathrik an hmu ruangah minung suan pangding phang in Mink 1 million lenglo an that dah zo a si.

Mink hmul thawn tuah mi Kawrhlum

Mink hmul pawl cu a nem in a ṭhatuk ruangah kawrhlum, ṭukṭak painak zaal tivek tuah nakah an hmang ih Mink hmul quality ṭhami thawn tuahmi kawrhlum pakhat cu $150,000 hrawng a maan a si.

ref:RT,FP

Leave a Reply

Your email address will not be published. Required fields are marked *