Covid 19 mina thawn Ek-inn sungih Nupa sinak hmangtu Nurse nu Mualpho

Indonesia ram ih Nurse pakhat cu Covid 19 mina thawn ekinn sungih nupa sinak an hmang mi thuhla, Social media ah a lar ciamco ruangah a mualpho hlei ah Indonesia anti-pornography Daan thawn kaihkhih a tong.

Mipa tu sawn hi Jakarta, Wisma Atlet quarantine facility ih zohkhen mi Covid 19 mina a si ih Nurse nu thawn ek-inn sungih nupa sinak an hmang thuhla cu uangawknak ah hmangin social media ah a thlah.

Zahmawh rimnam ṭongkam hmangin an terawnak WhatsApp message cu social media ah a lar ciamco ih Indonesia online anti-pornography zingzoitu pawl in an rak hmu ve.

Zingzoinak an nei vivo ih an pahnih in thusutnak an nei tikah Covid-19 mina Siizung hrang ih hmansung a si mi Olympic athlete riahbuk ek-inn sung ah nupa sinak an hmang taktak thu an phuang aw.

Jakarta Regional Military Command ih Lieutenant Colonel Arh Herwin BS cun “Ekinn sung ah Nurse nu ih PPE thuamhnaw darhaw thluhmi tivek zuk khal a post tel. Nan, tu ahcun a social media account a phit zo.”

“An case cu Central Jakarta Palik kut ah kan transfer zo ih health worker khal cu thusutnak nei bet dingin kan kut sungah a um.”

“An pahnih ten Covid 19 nat check nak an nei ih Nurse nu cun nat a nei lo nan mipa tu sawn in nat a nei lai. Mipa sawn cu a umnak cia ah khum hrih a si. Nurse nu khal Covid 19 mina thawn hnuaihnihawknak a nei ruangah Siizung isolation room ah khum hrih in a um.”

Mina pa in social media ih a thlah mi ca le screenshot pawl cu pornographic thawn pehparawknak neimi a si lo nan cozah lam cun anti-pornography laws hmang in hmalaknak an nei pehzom tum.

Zingzoinak an nei bet dingih an mawh a si tiah hmuhsuah a si le kum 10 sung thawngtlak thei dinhmun an si.

Leave a Reply

Your email address will not be published. Required fields are marked *