Covid 19 dokhamsii na dawt le Zaawng ah na cang ding timi Thuthang diklo a Lar

Oxford University scientist tuah mi Covid 19 dokhamsii sawiselnak thuthang diklo cu Russia ram in a suak ih online ah a darh vivo.

Thuthang diklo darhter dingin campaign an tuah ih zuk phunphun an tar. Zuk pakhat ahcun tulaifang, UK ram ih Covid 19 dokhamsii tuah rero tu AstraZeneca company hmin ngan mi kawr fual cu Zaawng an hruh ter ih sidawtnak an keng ter.

UK PM zuk khal zawnghmel ah an edit ih ca mawi lo zet an ngan. Zaan ih thlah ṭheu mi Video thuthang channel pakhat khal in sidawtnak keng lai Kingkong zuk an ti lang ih “thinphang hlah Zaawng thawn tuah mi dokhamsii a ṭha ko” ti`n ca an ngan.

Virus dokhamnak tuah ding ah virus thotho (minung,zaawng taksa ta lak mi) hman a si ṭheu ih AstraZeneca company tuah mi Covid 19 dokhamsii cu Zaawng virus thawn tuah mi a si ti`n an puh ih a dawt tu cu Zaawng ah an cang ding ti`n thuthang an suah.

Hih thuthang cu Covid 19 nat karhzia cuang nak India, Brazil tvk ram pawl in Russia tuah mi Covid 19 dokhamsii lei ding beisei ruangah tuvekin thuthang diklo an phuang hrim nak a si ti`n zumnak a um.

Hih thuthawn pehpar in AstraZeneca chief executive Pascal Soriot cun “kan tuah mi sii cu Leitlun hmun dangdang ih tuah rero lai mi Covid 19 dokhamsii tuah dan vek ih tuah mi a si. Zaawng virus kan hmang lo.”

“Hivek thuthang diklo hi mipi hrang ah a hrisel lo zet. Rampi buainak suak ter thei ding khawp ih ṭihnung a si. Curuangah Covid 19 dokhamsii thawn pehpar mi thuthang cu rinsantlak hram in a suak mi si maw, si lo, ralring zet ih ngaiṭhat a ṭul” a ti.

Mifimthiam pawl in hih thuthang diklo hin conspiracy theorists le Vaccine dawt dokalhtu pawl ih lung a tho ter ding an phang zet ih thuthang karh zai lo dingin mipi in ṭuanvo kan nei tiah simthannak an nei a si.

Hram:DailyMail

Leave a Reply

Your email address will not be published. Required fields are marked *