China Thuṭhenzung in Riittheih sii phurtu Australia ram mi That dingin thu ṭhen sak

Rittheih sii phur ruangih kaihtuar Australia ram mi Cam Gillespie cu China, Guangzhou thuṭhenzung in kandung tlawngkai ni 3 ah that dingin thu a ṭhen sak.

Chinese local media ih sim vek a si le tu ih thih daan pek a si mi Australia ram mi hin 2013 ah rittheih sii (methamphetamine) 7.5 kilograms a phur ruangah kaih mi a si ti a siih China ram daan palhbal ruangah thi dingin thuṭhensak a si ti`n an sim.

China rampi cun Cam Gillespie that ding thu cu tuizing lawng ah official in a phuang ih hih thuhla ruangah Australia le China ram karlak ih hmuhaw thiamlonak a sang sinsin ding zum a um.

An ram hnih hi remaw zetih dawraw ringring an siih kum 2018 sung lawng ah $214 billion man an dawraw.

Asinan May thla sung ah Australian Foreign Minister Marise Payne in Covid – 19 thuhla thawn pehpar in China ram rinhleh an um a si ti`n a ṭong suak hnu ihsin an karlak ah hmuaw thiamlonak a suak thok ih Cam Gillespie thih daan peknak hin an karlak ih hmuaw thiamlonak a sangter sinsin ding zum a um.

China ramsung ih riittheih sii daan ahcun 50 gram (0.05) hnak ihtam riittheih sii phurtu cu an mai` rammi a si khalle thih daan pek ding an timi a si ruangah methamphetamine 7.5 kilograms phurtu Cam Gillespie cu thi ding in thu an ṭhen saknak a si.

ref:Bing,TOI

Leave a Reply

Your email address will not be published. Required fields are marked *