China ram ih Internet Addict Center ongtu an kai

Kum 10 lenglo internet addict center ongtu China pawl cu nauhak hrem in innsung ih an khum ṭheu ruangah China thuṭhenzung in thawng thlak dingin thu a ṭhen sak a si.

China cozah in an ramsung internet hmandan a control zet nan leitlun ih internet hmangbik ram ah an tel thotho ih mipum 850 million lenglo in internet an hmang ih mipum 200 million hrawng cu kum 15 in 35 karlak hrawng an si.

Internet hmang artcilh an tamtuk ruangah China cozah cun 2008 ah internet addict cu nat phunkhat a si tiin official in a phung hnu in internet addict center ongtu pawlkom an suak ciamco ih paisa hawlnak ah an hmang thok.

Nu le pa pawl khalin internet addict tu an fa le pawl cu kilkhawi peih loin cuih addict center ah an ret tamzet. Asinan addict center ih lut nauhak pawl cu an pu le pawl in an hrem nasatuk tiin thuthang a suak ih China cozah lam in zingzoinak an nei hnu ah thudik a si zia an hmusuak ruangah tuvekin thawngthlak dingih thu an ṭhen saknak a si.

Addict center ih hremawknak ruangah kum 2014 ah kum 19 mi fala nute a thi. Hmun ṭhehkhat ih center phei ahcun nauhak pawl an thluak fimseh tiin an lu ah electric an shock ter. Tleu lut thei lonak box sung ah puan sinding le zuun-ek thawh nakding bawm thawn lawng khalin an khum ṭheu tiin China media ṭhenkhat in an ngan a si.

Hiti vekin hremawknak a um timi thuthang a um ruangah China local government in 2017 ihsin zingzoinak a nei thok zo.

Tuih, thawngthlak dingmi minung 4 pawl cu tleirawl kum 18 vuakvel mipum 12 pawl innsung ah hrem in an khum ruangah a siih Addict center ih hnaṭuan Wu cu kum 3 kim zikte, Ren le Zhang cu kum 2 le thla 7, an rualpi 1 cu kum 1 le thla 10 thawngtlak ding an si.

ref:TFPTimes,CNN,WIKI

Leave a Reply

Your email address will not be published. Required fields are marked *