China : Kum Ting 5 luan zo ih Puak kuai mi Meisa Tlang a nung thok saal

Tuhlan kum ting 5 luan zo ih arak puakkuai dah mi Wudalianchi volcanic field ih Wei meisa tlang cu puak saal dingin a remaw rero tiah China researcher pawl in an sim.

Meisa Tlang cu Korea le Russia ramri (Heilongjiang province) neih te ih ummi a siih a tum lam ah peng 3, a sang lam ah metres 100 hrawng a si.

Hefei khua, University of Science and Technology ih Geophysicist mithiam pawl in Wudalianchi volcanic field kiangkap ih zirnak an nei nakah rinlopin an hmusuak mi a si.

University of Science and Technology professor Zhang Haijiang cun “Wudalianchi volcanic field ih hmun 100 lai ah zirnak nei vivo dingin kan feh nakah kan hmusuak mi a si. A thi zo hmang ih kan ruat mi Wei meisa tlang cu kan hmanrua pawl thawn kan check tikah puaksuak thei mi meisa tii (magma chambers) hmun 2 ah cangvainak a nei rero mi kan hmusuak.

Kan hmanrua pawl ih a lang mi vek a si le chamber 1 sawntu cu magma zaṭek 14% hrawng a si zo. Zaṭek 40% a kim le a puakkuai thei a si” a ti.

Asinan meisa tlang lam ih mithaim China Earthquake Administration director Xu Jiandong cun “Wudalianchi volcanic field ih meisa tlang puak netabik cu 18th century ah a si. Cumi ihsin a suak mi meisa tlang pahnih kan thlir nak kum 10 a luan zo ih theihtham ding khawp ih cangvaihnak kan hmu dah lo.

Wudalianchi volcanic field ih Meisa Tlang puak netabik cu 18 Century hrawng ah a si.

“Atu an hmusuak mi cu a tii rero mi lungto meisa tii siloin tidai le lungto awn a si sawn tla si men thei” ti`n a sim ih “ciang zet ih kan theih theidan ding cu a hmun ah umhmun khuar in caan rei nawn zirnak nei seh la kan thei, theiding. Atu ih an hmusuah mi cu a dik maw diklo ti cu ka sim theilo. Nan, pakhat ka sim thei mi cu Wudalianchi region ih meisa tlang ṭhenkhat cu a nung a si” a ti.

ref:ScienceJournal

Leave a Reply

Your email address will not be published. Required fields are marked *