China ih Covid 19 hmuh hlan Thla 9 ah Coronavirus a rak um zo – Oxford University experts

Coronavirus thawn pehpar in Leitlun mifim pawl in zirnak an nei rero ih tukhalah Oxford University ih mithiam pawl cun an hmuh mi thawn pehpar in China ram ih Covid – 19 a um hlan ah hmun dang ah a um zo, an zum thu an phuang a si.

Centre for Evidence-Based Medicine (CEBM), Oxford ih zirhtu Dr Tom Jefferson le Newcastle University professor titinak ihsin an sim suak mi a siih, an zirnak par ih humhsuakmi ahcun Covid – 19 cu China ram ih a suak hlan ah, hmun dang ah a suak zo ding an zum a si.

Dr Tom Jefferson

Kandung zerh ah virus suakkehnak zingzoitu Spanish virologists cun China ram ih Covid – 19 an hmuh thok hlan thla 9 duh ih (March 2019) lak mi tidai samples ah Covid – 19 neh a hmu thu a phuang zo.

Covid – 19 hmuhsuah hmaisabik hlan zerh 2-3 duh hrawng ih lak mi tidai bal (sewage samples) khal ah Italy scientists pawl in coronavirus neh an hmu ih, Brazil scientists pawl khalin November thla ah an hmu zo a si.

Dr Jefferson cun Coronavirus cu leitlun hmun tamzet ah a um cia tiin a zum ih hmun le boruak zirin an suak thei ding ti khalin a zum. Azumdan cu mitṭhep kaar ah an suak thei vekin mitṭhep kaar ah an hlo thei.

“Sars 1 natnak kha teh khawilam a thleng? A hlo puppi men. Curuangah thuk zetin kan ruat ṭul. A suaknak le a karh zia dan kan zir nasat a ṭul”

“Ka zum dan ahcun corona virus cu hmun tamzet ah a um cia. ka sim duhsan cu hmuntinkim ah a um cia. A hmun le boruak zirin an suak puppi sawn a si”

“February thla ah Falkland tikulh ah case thar a suak. Khawinah in a thleng thei? Georgia ihsin Buenos Aires lam feh mi laawng pi khal ah ni 8 a kim hnu, Weddel Sea lam pan ih an feh lai ah case thar a suak. Ei-in siat lo dingih an ret mi vur khal lakah nathrik um cia in a hmun le boruak zirin a nung thutthi teh si pei maw?”

“Spanish Flu natnak suak lai khalah thil mak zet a suak kha. 1918 hrawng ah, Western Samoa ih um mipi zaṭek 30% hrawng cu Spanish Flu natnak ruangah an thi. An nih khal kha hmundang, ramleng minung thawn pehtleihnak nei lomi an si.” tiin Dr Jefferson cun a sim ih vurus pawl cu biakawnak, khuhkhuh le hnaptilung mi ihsi lawng siloin leihnuai ih tidai sia sewage system ihsin le ek-inn hmanrua ṭawmawknak khalin suanawk a theih ding a zum thu khal a sim bet a si.

1854 kum, London ih natsia (cholera) karhzai mi, a thokdan hmusuak tu John Snow ih zingzoinak a nei vekin, thuk zet le ciang zetin Covid – 19 suahkehnak zingzoi an duh thu Dr Jefferson le Professor Carl Henegehan cun an sim a si.

Wuhan Lab

“Ziang bik ruangah, olten suanaw theihmi natnak pawl cu food factories le sa pack nak hmun ihsin a suak hmaisabik ringring” timi khal ciang zetin zingzoinak nei thei sehla, Virus suahkehnak hmu a oldeuhding.

Sa tuamnak hmun le a leng mi thawn pehtlaihnak nei dahlonak hmun pawl ah Virus a suak ṭheu ih, cu pawl cu kan zoh a si le thusutding tamzet a um. Khawinah ihsin virus a suak thok, lenglam thawn pehtleihawknak umlonak hmun pawl ah ziangtin virus a thleng thei tvp ruahding tamzet a um. Curuang ah tu vekih virus suak mi cu pakhat hnu pakhat, a ha haa ten zingzoi sehla a suak thoknak kan hmu thei lohliding a si” tiin Dr Dr Jefferson cun a sim a si.

ref : Wiki, Telegraph

Leave a Reply

Your email address will not be published. Required fields are marked *