China an huattuk taakah India cozah in Dragon Fruit hmin a thleng

India Prime Minister Narendra Modi suahsemnak Gujarat ih ramkulh cozah cun Dragon fruit hmin cu a China hmin tuk ti`n Kamalam (Lotus) tiah official in a thleng.

India le China ram cu ui le mee vek rori`h huaaw an si ih tukhalah ramri cuhaw in an hmuaw thiamlo. An ramhnih karlak thubuai ruangah India cozah in China ramsuak TikTok app telin China tuah mobile app tamzet cu ramsung ah hmang lo dingin a rak phit dah zo.

Tuṭum ih Dragon fruit hmin an thleng nak san khal China an huat tuk taakah a China hmin tuk ti rori ih thleng men mi a si.

Asinan, Gujarat Chief Minister Vijay Rupani cun a mawi nakah ti`n “tihrim awknak zianghman a um lo. A hmin thawn a milaw lo. Dragon fruit pianhmang cu Lotas par vek a si. Curuangah Gujarat cozahpi cun a pianhmang thawn milaw dingin Sanskrit hmin (Kamalam – Lotas) ah an thleng” a ti.

Lotas par cu India PM Modi tei` party BJP symbol a si ih party sungtel MP Vinod Chavda in “Lothlo pawl in a hmin thleng dingin ka hnen ah thuburnak an nei. Ramkulh cozah hnen ih ka simthei hnu, mipi authawng ngai in ramkulh cozah in a hmin a thleng ngaingai cu ṭha ka ti zet ih ka lungkim zet. Tu ahcun Dragon Fruit cu Gujarat ramkulh sungah Kamalam tiah kan ko thlang ding” a ti.

Dragon Fruit hmin thleng thuthawn pehpar in India ram mipi ṭhenkhat cun nasaten an soisel ih thilṭulmi a si lo ti`n an au.

BJP party thawn zuamawzettu Congress party ih sungtel Manish Doshi khalin “ramkulh hrang ṭuansuakmi khih hmuh ding pipa an nei lo ruangah mipi ciithlum an barh menmi a si” a ti.

Leave a Reply

Your email address will not be published. Required fields are marked *

error: hahahahahaha !!