Chin raltlan tamzet umnak Delhi khualipi ah Covid mina a phul in an phul

Chin raltlan tamzet umnak Delhi khualipi cu tufang ah dinhmun ṭhalo zetin a um. Aninii in Covid mina an pung vivo ih cozah Siizung lam khal hai an daih aw nawn lo.

Nikhat hnih sungah nat nei thar an tamtuk ruangah ni 7 sung lockdown tuah dingin Delhi cozah in thuthluknak a tuah ih tuizaan April 19, zaan nazi 10 in lockdown nei ṭan ding a si.

Delhi cozah Siizung zate deuh thaw cu Covid mina tuamhlawmnak ah hman lawk an tum ih Siizung um cia mina besiatuklo cu inn lam ah an tlun ter thluh.

Cuticingin Delhi cozah Siizung zaten Covid mina an khat thluh ruangah kum upa, mina tuamhlawmnak nursing home le bulpak Siizung pawl khal Covid mina hrang hmun tuah dingin Delhi cozah in thu a suah.

“Covid test tuahtu mipum 3 ah mipakhat a positive. Nihnih-thum sungah thinphang ding khawpin mina an pung sawt. Kan Siizung ih rathleng Covid mina zate deuh thaw cu mi cor pawl bangih mah te ding thei nawnlo besiazet an si” tiah cozah Siizung (Aruna Asaf Ali Govt Hospital) ih hnaṭuan Dr. Amad Hussain in HT hnen ah a sim.

Chin raltlan tamzet umnak Janakpuri C1 lam khalah Covid nat a karh nasatuk ih tuzarh sung ah Chinmi rinsantlak pacangno pakhat khalin Covid nat thawn mual in liam san. Cuih tlun ah mina besia nunnak hrang tiang phansak ummi Chin raltlan dang khal an um tiah theih a si ih Covid positive nan besia tuklo Chin raltlan Covid mina 50 an kim zik tiah Chin community hruaitu pakhat in a ti.

Hiti`n Delhi khualipi ah Covid nat a karh ciamco cu ramkhel duhphorh lamzawhnak le biaknaklam puai tuah lole biaknak thawn pehpar ih mibur pungkhawm pawl ruangah a si tiah India PM Modi in a ti.

Tui dinhmun ah Delhi khualipi ah Covid mina 853,000 an um zo ih cumi ah damsal 766,000 le mithi 12,121 an um zo. Rampi pumhuap zawngin India ram cu leitlun covid mina tambiknak US sangtu a si ih tuidinhmun ah Covid mina 15.1 million an kim ih damsal 13 million le mithi 179000 an um zo a si.

Leave a Reply

Your email address will not be published. Required fields are marked *