Chin refugee tamzet umnak Delhi khualipi Dinhmun Ṭhalo

India ramsung ih Chin refugee tambik umnakhmun Delhi khualipi cu Covid-19 a karhzai vivo ruangah India ramsung ih dinhmun ṭhalo khua pakhat ah hminsin a si zo.

Ni 75 lockdown phelhhnu biakinn le dawr ṭhenkhat onsiang a si hnu in Covid-19 a karh vivo ih mifimthiam pawl cun July thla hrawng ah nasa takin a karhzai vivo ding an zum.

India cozahpi khalin a cang thei tawk in cangvaihnak a nei ve ih riahbuk le seenpi inn pawl khal mina retnak ah hmang dingin tawlrelnak a nei rero.

Progressive Medicos and Scientists Forum president Harjit Singh cun “mipi 16 million umnakhmun khawlipi a si vekin duhthusam ih cangvaih a theih lo. Cozahpi in sisung khal tawkmawi a nei ko. Asinan Covid-19 natnak cu tanta hrihin fa nei, damlo pangai pawl umnak ding hman deihaw ṭhiṭhalo a si ruangah thin a pit duh nasa”.

“Central le State cozahpi khal cangvainak a nei ko. Asinan mipi hrang ih a ṭangkai dingmi cangvaihnak ngaingai a neilo”.

“Official ih nathrikkai phuangnak an nei mi khal rin a theihlo. Natnei besia sizung thleng 10% pawl lawng testnak nei a siih adang 90% cu mipi lakih tlangleng lole inn ih erhpit an si. Curuangah tu ih kan dinhmun cu a pil cuahco mi lawng thawn tipi ralkhat thlengtum vek kan si” tin a sim.

Hih thuthawn pehpar in CM Kejriwal hnen ah thusutnak an nei nan simfiahnak zianghman a tuah lo ih khawsung mipi hriselnak thunei pawl khal in simfiahnak neilo in an hrial.

Covid-19 testnak nei Delhi University ih cazirhtu pakhat khalin “kan umnak thawn neihbiknak central ah nat check dingin ka feh ih amalbik minung 35 hrawng kan um. Social distancing daan thlunnak khal a um lo. khami ni ih a feh hmuahhmuah cu natnak kan suanaw ṭheh ti cu a ciang lawlaw. Inn lam ah nathrik kan tlun sawn lam” tiin a sim ih inn ah tlung in arh-pit aw uh tin an sim men thu khal a sim bet.

Cutivek dinhmun kan si ruangah “Cozahpi ih simduhmi cu a fiang zo. Cangthei patawp suah in nan mah ten enkolaw uh. Cozahpi cu mipi hmai ah kutkholh in dung a her zo a si” tiin Progressive Medicos and Scientists Forum president Harjit Singh cun a sim.

India ramsung ah Covid -19 natnak kai 287000 an um ih mithi 8102 le damsal 141000 an um zo. Delhi ih natkai mipum 31309 lak ihsin mithi 905 le damsal 11861 an um zo a si.

ref : business-standard, Indianexpress, TOI, Wiki

Leave a Reply

Your email address will not be published. Required fields are marked *