Camsiatmi Lungto in Ka innsang ah Tlaksiatnak rapthlak a thleng ter

“Italy ram, Pompeii khua ih thil ka rak fir dah mi in kei mah le kan innsungsang hnen ah tlaksiatnak, vansiatnak rapthalk a thlen ter” ti`n Canada mi Nicole cun tuhlan kum 15 luan zo (2005 kum) ih a rak lak thup mi Lei-beel kuai fate, zialphah ih hman mi lung kuai tvk cu camsiatmi a si ti`n Pompeii, Archaeological Park ih ṭuanvonei pawl hnen ah ngaithiamdilnak ca thawn a kuat sal.

Pompeii khua cu Roman san lai ih khua hminthang pakhat a si ih AD 79 hrawng ih Meisa Tlaang puak ṭum ah meisa tii le vutcam in a khuh thluh. Mount Vesuvius Meisa Tlaang ih suak mi vutcam le leikhu 13-20 feet thuai ah phum in a um.

1748 kum lawng ih hmusuak salmi khawhlunpi a siih mithi ṭhenkhat pawl cu Meisa Tlaang puak ṭum ih an thih dan vek ciah in an ruak vutcam khaal pawl cu hmusuak thluh sal a si.

Cuvekih vansiatnak rapthlak thlennak hmun a si ruangah miṭhen cun camsiattuar mi khuahlunpi vek ah an ruat ih, Canada ram mi Nicole khal in hih hmun ih thilri a tlun thup hnu in a innsungsang le a mah par ah vansiatnak rapthlak thleng in a ruat.

A tlun thup mi thilri a kuat sal nak ih ca a ngan tel mi ahcun “himi ka tlun thup ruangah voihnih rori ka pawhte ah cancer nat a suak. Damlonak kan tuar hlei ah sumsaw lam khal ah tlaksiatnak rapthlak kan tuar. Miṭha sungkua kan si ih hih camsiatnak cu ka tefasin in an tuar ve ding ka siang lo. Curuangah ka lak thup mi thilri pawl cu ka lo kuat sal hai a si. A umnak hmun ah rak ret sal hraam uh “ti`n a ngan.

Tuhlan khal ah Pompeii khua ta thilri tlunthuptu tourist 100 luan hrawng an rak um dah zo. Cupawl khal cu Pompeii ihsin thil an tlun thup hnu in vansianak hlir an tong ruangah an lak thup mi thilri pawl cu Pompeii, Archaeological Park ṭuanvoneitu pawl hnen ah an kuat kir sal dah zo a si.

Hram:TheGuardian,CNN

Leave a Reply

Your email address will not be published. Required fields are marked *