BualRawn 22 tiat Siizung thawn Delhi in Covid -19 Do Ṭan

India ramsung ih a karhcak zetmi Covid – 19 doding in Delhi khawpi cun timlamnak a nei rero ih, tukhalah football field 22 thawn tiat awmi leitlun corona care facility tumbik hmang in Covid – 19 do a tum a si.

Delhi khawsung ih covid 19 karhcakdan zoh in July thla cem hrawng ah natkai 500000 hrawng an kim ding tiih mifim pawl ih simmi cu cozah lam in ngaihsak zetin a tawlrelnak ihsin tuahsuak mi health care facility a si.

Delhi, Radha Soami Satsang Beas campus, Chhatarpur ah Covid – 19 positive pawl le coronavirus positive pawl vek ih damlonak pianhmang nei pawl enkolnakding ah temparary in an sak ih football field 22 (12,50,000 sq feet) tiat a si.

Hih centre pi ah mina tuamhlawm nakding ihkhun 10,000 ret a si zo ih hnaṭuan tuding doctor 1,000 le hnaṭuanbawm tuding paramedics pawl cu Indo-Tibetan border palik pawl in an kil ringring ding a si.

Ihkhun 10,000 lakih Oxygen bawm telchimi ihkhun 1000 cu sections 100 ah an ṭhen ih, fan 5000 le mina pawl ih thiarfihlim awknakding inn-te 1000 khal ret ṭhepṭhi cia a si.

India mifim pawl ih zirnak nei, hmuahsuahmi ah, September thla ah India ramsung ih Covid – 19 natnei luarkaibik lai a si ding ti a siih zirnak ih telve Scientist pakhat cun, “India ramsung ih lockdown thla 3 zikte nei mi cu san a tlailo. San a tlai lo timi ah Virus a ti hlo cuanglo tinak a si. Covid 19 karhluar ding ni/caan a ṭhawn men. Kan zirnak ih kan hmuh suakmi zoh a si le a ra lai ding September thla lole November thlathok hrawng ah luar bik caan a thleng ding” tiin a sim.

India ramsung ih coronavirus karhcakdaan zoh in le mifim pawl ih ruahnak pek mi cu Delhi cozah in thungaithlak takin a ruat sak hnu ah leitlun ih tumbikmi Covid – 19 care centre tuah dingin thuthluknak a tuah mi a si.

Tufangah India ram ih covid – 19 kai minug 548,318 an um ih, cupawl lak ihsin minung 321722 dam salin mipum 16475 an thi zo a si.

India ramsung, Chin refugees tambiknak Delhi khawlipi khalah nat a pung cak zetih India ramsung ih Covid – 19 nat pungcakbik hmun 3 nak a siih confirm case 80,188, damsalzo 49,301 le mithi 2558 an um zo a si.

ref:NYC,IT,TheHindu,TOI

Leave a Reply

Your email address will not be published. Required fields are marked *