Bollywood star pawl khal lamziinkap ah Hanghnah Hangrah an zuar mei

India ram ah Covid – 19 ruangih harsatnak tong an tam zetih zuknung khawlvel Bollywood sung khalah ṭuan ding umlo ruangah mitam zetin harsatnak an tong.

Aamir Khan cangnak, zuknung hminthang “Ghulam” ih  telve Javed Hyder khal Bollywood industry ih hnaṭuanding a um nawnlo ruangah lamziin kapah hanghnah hangrah a zuar.

Amah hi TikTok ih larzet a siih fan khal a nei tamzet. Hanghnah hangrah a zuar lai cu video in a zuk ṭheu ih TikTok ah a thlah ṭheu. Zohtu tla a neitam zetih, thusutnak an nei mi ahcun, “Bollywood ih hnaṭuanpi rualpi pawl khal hnaṭuan ding a um lo tikah harsatnak an tong zetih, nu le pa biak dah lo pawl khal tingaihnak thei loin ningzak cing ten an suahnak khua an pan sal”.

Kei khal, rawl eiding neilo ruangih thih hnak cun tiin pian tawn pian ka ti ih leeng cuh in hanghnah hangrah ka zuar mei. Ka ning a zak lo. Ningzak ruangih ṭuan ngamlo cun rawllo ih thih si mei” tiin a sim.

Salman Khan thawn zuknung cangtlangdah Pooja Dadwal khal Covid – 19 nat a kai ih hnaṭuan theilo/umlo ruangah rawl ei ding a nei nawnlo ih Salman Khan hnen ah bomnak a dil.

TV le reality show ih tel ṭheu Ashiesh Roy khal kaileng natnak thawn siizung a thleng ih a dam hrih lonan paisa pekding a nei nawnlo ruangah ka thih kha le thi mei tiin siizung ihsin a suak a si.

ref:MSnews,Timesnow

Leave a Reply

Your email address will not be published. Required fields are marked *