Bill Gates tei` nupa karlak Thuthup cun Leitlun mipi a ti mangbang

2021, May thla thok ah Leitlun milianbik 5 lakih telve, Mifim thiamsang Bill Gates te nupa in ṭhenawfel dingin thu an botcat zo thu twitter hmangin tlangthannak an nei cu Leitlun mipi an mangbang thluh.

Neihsiah lam ah le paisa siar cawk loi` nei, Fimthiamnak lam ah le thiamsang fawn si, Innsang fanau ti ah le fapa/nu 3 nei zo fawn si in ṭulsammi neilo innsungsang pakhat ah ziangtin hivek thil a thleng thei tiah thusutnak hlir in a khat.

Thu phunphun ruangah an ṭhenaw tilawngin thuthang a suak ih an sung thuhla felfai theitu mipakhat cun kum 56 mi Melinda Gates sawn in a ṭhenmi a si tiah New York Post hnen ah a sim.

Innsangnu in Bill Gates a ṭhen nak san hi official ih ca suah/nganmi hmuh ding a um lo nan Internet san a si vekin online ahcu thuhla phunphun hmuh ding a um. Cumi lakah thungai thlak ih ngaihsak hlawh pakhat cu “an mai company (Bill & Melinda Gates Foundation) ih hnaṭuan China nu ruangah hivek dinhmun an thleng” ti hi a si.

Bill Gate le China mi Zhe ‘Shelly’ Wang (kum 36) karlak ah thuhla a um ruangah a nupi Melinda Gates in a ṭhenmi a si tiah thuthang a suak.

Asinan, Zhe ‘Shelly’ Wang cun thulengvak men a si a ti ih “thuthang diklo a si tikah athok ahcun zohman in an ngaisak cuanglo ding tiah ka ruat. Nan, ka ruat vek a rak si lo. Thungai vekin online ah a darh ciamco cu mak ka ti zet. Private Messages kuat in hih thuhla in simtheitu siseh, thuthang diklo a si tiih in dinpitu rualpi pawl par ah ka lungawi zet” a ti.

Pasal neilo, atufang Seattle ih um Zhe ‘Shelly’ Wang cu fimthiamnak lam ah zirsang a si ve. Ṭong picang phun 7 a thiam ih Yale School of Management, Harvard Business School le Bill & Melinda Gates Foundation ah ṭonglettu dinhmun ih hnaṭuan rero a si.

Bill Gates le Zhe ‘Shelly’ Wang karlak ah ziangvek thu a um ticu theihfel a si lo nan hivek dinhmun tiang Bill Gates puhmawhtu an um cu a nupi thawn an karlak ah thuthup ziangmawzet a rak um ruangah a si.

Thuthup tamzet lakih relsiat hlawhbikmi pakhat (tu ahcun an nupa thu ngaihventu tamsawn cun an thei thluh deuh thaw) cu Melinda Gates thawn kutsihnak an nei hnu khalah a fala hlun Ann Winblad thawn kum 1 voikhat vacation an feh tlang ringring mi hi a si.

Bill Gates le a fala hlun Ann Winblad an thlahaw thei lo

Kum 1997, Time Magazine, Bill Gates profile ih an ngan mi ah a fala hlun Ann Winblad thawn kum 1 voikhat vacation feh tlang thei dingin Bill Gates le a nupi Melinda Gates karlak ah tiamkam ngankhum hminkhennak an nei ti a si.

Bill Gates thawn hna rak ṭuan tlang dahtu hminthup mipakhat cun “Bill Gates le a fala hlun Ann Winblad cu an thlahaw thei ngai lo. Kum 1 voikhat, weekend pumhlum in vacation an feh tlang. Cumi cu kum 2000 hlan ah anupi Melinda Gates thawn contract (စာချုပ်) an rak tuah cia mi a si tikah a thik khalle tingaihnak um lo”.

“Cun, a caancaan le khuadang hmun hla ah um ciangin vitual biakpawhnak neiaw in an umnak veve in mawṭaw bangrepmi thawn khuasung ah an leng tlang. Hmun hranhran ah um cing in a bangaw cekcimi cinema zuknung tivek khal an zoh tlang ṭheu” a ti. Amah Bill Gates khalin kan nu thawn neiaw dingih thu ka ron hmaisabik cu ex-girlfriend Ann Winblad a si a ti.

Cuvek lungput neitu a si ruangah kum 27 sung rori um tlangin fanau 3 nei ciangin tuṭum ah hivek dinhmun an thleng cu Bill Gates mawhpuhtu an tam ih China nu thawn thuhla an rak nei thup ngai khal a si men thei tiah ruahnak a um a si.

Tu ah, Bill Gates le Melinda Gates cun ṭhenaw dingin thu an botcat zo nan fanau fingkhawi nakah le pursum lam tuahnak ahcun kutzakai tlangin khawsa an tum a si.

Leave a Reply

Your email address will not be published. Required fields are marked *