Beirut Tipikap godown puak ruangih Mit Caw an tam

Lebanon, Beirut tipikap godown puakkuai nakah minung 177 hrawng an thi ih mipum thawngtel in hliamhma an tuar. Cupawl lakah paukkuainak ih sem pet mi thlalang kuai, thinghnair, concrete belcawng tvp ngahnak ruangih mitsiat an tamzet.

Mit lampang khawngawmi minung 400 hrawng an um ih mipum 50 hrawng ih mit, surgery tuah a ṭul ih mit caw lanta khal, mipum 15 hrawng an um tiah CNN cun a tarlang.

Sama tiih an koh mi kum 5 nu te khal, a mit ah thlalang kuai a lut ih nasa zetin a khawngaw. Sama pa Makhoul Al-Hamad cun, “Sama cu milengkhan sangkate kiangah a tlang rero ih puakkuai awn kan theih veten a nu in a va pom lohli. Thinphang thawn minute 3 hrawng a pom hnu ah kan vun zoh ciang cu a mit ihsin thisen a dok thluahthlo” a ti.

Puakkuainak ruangah Websolutions developer Maroun Dagher khal a mit khatlam a caw. Amah cun, “ka mang ah ka mit ṭha in khua ka hmu theiih ka lungawizet nan ka vun ṭhang cu ka mang sawn a rak si.”

“Tuah dingmi le tumtahmi tamzet ka nei. Skydiving ka zirtum rero lai fang a si. Cun, developer dinhmun in pumcawmaw ka si. Nan, tu ahcun ka mit khatlam a caw tikah ka hnaṭuannak lam ah hlanlai vekin ka ṭuan thei nawn ding maw tikhal ka thei nawn lo.” a ti.

Tu ah Lebanon ramah buainak nasa ten a suak. Puakkuainak ruangih Inn le Lo siat thluh an tam zet ih hnaṭuan neilo khal an pung vivo. Cuhleiah Covid -19 a rak umbet ih, tuṭum puakkuainak suak hnu in nathrik kai an pung vivo ruangah mi na retnakding sizung khal an teng awlo tiah CNN cun a tarlang a si.

Leave a Reply

Your email address will not be published. Required fields are marked *

error: hahahahahaha !!