Beirut Thlairawl khawlnak a kaang ih a cim ruai ro

Lebanon, Beirut khuapi tipikap ih Thlairawl khawlnak hmunpi cu a zarh teelin a muutaw hnu, July 31 ah a cim ruairo.

Thlairawl khawlnak cu 2020 August 4 ih chemical ret mi a puak kuai nak hmun, Beirut Lawng colh nak tipikap ih um mi a si ih, Lebanon cozah cun boruak hlum, thawsa ruangah a kaang mi siding an zum ih a kaang pek ihsin mipi ralrin an pe rero zo.

Hih hmun hi 2020 August 4 ih puakkuainak a suak hnu ah, hmun him lo tiih hminsinmi a si ih, Lebanon cozah in siatbal an tum nan mipi in siatralnak hngilh lo nakah amah keel in umter an duh ruangah siat lo in an ret mi a si.

A kaang thok nak hi zarh teel a si zo ih, a muutaw mi cu zaan thim ah orange rong in a lang. Kiangkap um khawmi pawl kan thin in ti hring zet tiah tualsungum Tarek Hussein in media hnen ah a sim.

“Tutiang, kan hngilh thei lo mi August 4 siatralnak atharin a hring suak sal. Zarh teel ih meisa a muutaw mi cu zaan thim ah orange color vek sendup deuh vekin rapthlak um zetin a lang ih, kan thin in ti hring zet. Atu ah ṭhen khat a cim bet cu ka innsang pawl tla cu hmun dang ah ceer lawk an duh” tiah a ti.

Lebanon ram, Beirut khua, Lawngcolhnak tipikap puakkuainak cu 2020 August 4 ih thil cang a si ih, Nuclear puakkuainak siar tel loin leitlun minung thiltuahmi puakkuainak hmuahhmuah lakih nasabik lam ah a tel ban.

Kum 2013 lam ihsin dawngdah zetih retmi chemical pawl cu rinlopin kum 2020 August 4 ah a puak kuai ih mithi 218 um in, hriam tuar mipum 7000 luan an um.

Puakkuainak a nasatuk ih Turkey, Syria, Palestine le Israel ram tiang a tlir ban ih Beirut khuasung inn tampi siatsuah in inn le Lo neilo mipum 300,000 luan an um phah.

Himi puakkuainak cang dingih mawhphurhbik cu Lebanon hruaitu cozah an si ih, hih siatralnak ihsin tu ni tiang an tung ding aw thei hrih lo.

Atu ih Fang khawlnak hmunpi a cim mi ah hriam tuar le khawng aw an um maw timi cu felfai in thu a suak lo.

Leave a Reply

Your email address will not be published. Required fields are marked *