Baby Shark Music Video in Youtube ih zohtu neitambik sinak record thar co … Top 10

Youtube ih Music Video zohtu neitambik sinak cu South Korean company Pinkfong ih suah mi Baby Shark in record thar a co.

7.04 billion viewer nei in Baby Shark video cun tuhlan ih Youtube video zohtu neitambik “Despacito” luan in record thar a nei cu a si.

Baby Shark cu nauhak hla a siih 1970 kum ah US summer camp ih rak suak thok mi sivek in an rel.

Kum 2015 ah South Korean company Pinkfong in kum 10 mi Korean-American singer Hope Segoine sak thar ter sal in Youtube ah an upload.

South Korea ram ah a lar ciamco ih hlasak thiam Red Velvet, Girls’ Generation le Blackpink group pawl in concert an nei nak ah an sak tel ṭheu.

Pinkfong cun June thla ah nauhak duhnung zet pahnih Baby Shark hla an lam lai video cu Baby Shark Dance timi hmin thawn an upload sal ih Leitlun hmun tinkim ah a lar thok.

#BabySharkChallenge ti`n Baby Shark hla lam lai challenge video tawi cu online ah an thlah ciamco
ih rapper Cardi B tiang in a rak lam phah ve.

Cutin a ninii in a lar vivo ih tu ah Youtube ih zohtu neitambik Music Video sinak record thar a co a si.

Hminsintlak : Pinkfong in Youtube lawng rori ah himi hla thawn $5.2 million a lak lut zo.
Baby Shark video zohtu/zohmi hmuhhmuh komkhawm in catbangloin na play a si le Kum 30,187 a rei ding.

Baby Shark hla ruangah an buai ….
Hla lar ṭhenkhat vekin a ngai nuam titu an um ih nin a um tuk titu khal an um ve.

Kan dung thla ah Oklahoma Thawng-inn ih hnaṭuan minung pathum cu Baby Shark hla thawn pehpar in buainak an tong.

Thuṭhenzung ih ngan khum mi vek a si le cute pathum cun Baby Shark hla cu thawngtlak minung 5 hrem nak ah an hmang.

Thawngtlak 5 cu phar ah nazi 2 sung bet ter in Baby Shark hla ring zetin le catbangloin an ngai ter.

Cumi thu ah District attorney David Prater cun “Thawngtlak harsa cia bet ah hih hla thawn hremawk bet cu thinlung le tiisa zawng khal in an bang tuk rori ding ” a ti. (BBC)

Leave a Reply

Your email address will not be published. Required fields are marked *