Australia cozah in India ram ih khualtlawng a ram mi dung a hoih san

India ram ah Covid nat a tamtuk ruangah Australia cozah cun India ram ih khualtlawng a ram mi pawl hrang ah daan thar a suah.

India ram ah tuhlan ni 14 sung ih khualtlawng Australia ram mi cu an ram ah kir khap an si. Cuih daan a pahbal tu cu Australia cozah in kum 5 thawngtlak lole paisa $66,000 cawh kuanter an tum tiah ramsung media in an ngan.

Atufang, India ram ah Covid pian hmang thlengawmi a karh ciamco ih nikhat ah minung ting 4 kim zik nat nei thar an um. Cuvek dinhmun a si ruangah Australia cozah cun a ram sung ah nat phurluttu umlo dingin ralrin nakah ti`n Australia san thuanthu ih um dah keel lomi Daan thar a suah hi a si.

Biosecurity Act thawn tinung dingmi Daan thar cu Zarhtezing May 1 in hman thok a si thei tiah ramsung media in an phuang ih ziangtik tiang a awh ding ti cu theih fiang a si hrih lo

Australia ram cu Covid ṭumkhatnak khalah a fimkhur zetih leitlun huap border phit hmaisabik ram a si. Tuṭum, India ram ih Covid ṭumhnihnak a ṭan hnu reilote khalah India in Australia direct vanzam pawl a rak khar thluh zo.

India hrambun media ṭhenkhat ih ngan mi vek a si le atufang India ram ih um Australia rammi mipum 9000 hrawng an um ti a siih cupawl lakah minung 600 hrawng Covid nat nei rinhleh mina an um tiah TIO in a ngan.

Leave a Reply

Your email address will not be published. Required fields are marked *