Australia : Caancem zomi million gallons Beer pawl cu renewable energy ah an tuah

Covid 19 boruak ruangah Australia ram ih bar le restaurant tamzet an phitter ih dawr thilri tamzet a siat phah thluh.

Dawr thilri lakih siatolzet pakhat cu beer pawl hi an si. A intu an umlo ruangah beer Millions gallons pawl cu caancem in an siatral thluh.

Asinan, cuih beer pawl cu hlon men loin Adelaide khua pawn ih tidai tifainak cetzung (Glenelg Wastewater Treatment Plant) ah an kuat thluh.

Beer pawl cu cuih hmun ah tulai technology hmangin an suang/filter bet ih biogas ah an tuah. Cuih biogas cu Glenelg Wastewater Treatment Plant meisa tha pek nakah an hmang theiih an ruah hnakin a rak ṭangkaizet.

SA Water treatment plant ih senior manager Lisa Hannant cun, “caan cem zo mi beer 150,000 litres kan hmang mi cun zarh khat ah 355,200 cubic meters biogas a suah thei. Cumicu May thla ta a si. June thla khalah beer 150,000 litres kan hmang mi cun 320,000 cubic metres biogas a suah thei. Cumi pawl cun Inn 1200 hrang meisa a pe thei” a ti.

Covid 19 ruangah Australia beer suang company pawl an tlaksia zetih an ramsung beer company tumbik Lion Beer Australia khal, an beer a siat ṭheh ruangah 4.5 million liters (1.188 million gallons) lenglo beer pawl cu an sungral ṭheh a si.

ref:CNN

Leave a Reply

Your email address will not be published. Required fields are marked *