Aung La N Sang in a Taikhap longtu Reinier De Ridder hrial a tum hrih

MMA fighter Aung La N Sang cun mizaan July 30 ih Leandro Ataides thawn an sualaw hlan ihsin nehnak a co a si khal le Taikhap cuh cih a tum hrih lo thu a rualpi hnen ah a rel suak.

“Taikhap neitu thawn sualaw ding hi thil olsam a si lo. A cuh duh tapiang in an cuh thei lo. Rank zir in a dotdot ten a feh mi a si ih a ngairtu a sung pang cun olsamten taikhap a cuh saal thei lo. Nan, taikhap neitu a sung pang cun a sung dan ih zirin le mipi hiip theitu a si le silo daan i zirin taikhap a cuh saal thei.”

“Cuvek a si tikah ngah harsa zetmi cuvek caanṭha ngahtu cu a hlan ai in nasaten timlamnak neih tlangpi a si ṭheu. Thazaang le taksa hrisel lawng siloin thinlung lam tiang hahdam zetmi si a ṭul.”

“Curuangah innsang siat ton ruangah siseh, Kawlram buainak ruangah donhar thinpit ih um Aung La N Sang cun Taikhap cuh dingin ka man hrih lo a ti. Ciamciamten ṭanṭhat a la vivo dingih a tikcucaan kim tik ah Taikhap a cuh saal ding” tiah Sanford MMA ah Aung La N Sang thawn training la tlangtu a rual ṭha pakhat in instagram cahmai ah a tar a si.

Aung La N Sang cu Middleweight le Light Heavyweight taikhap pahnih rori a rak nei dah nan mi buan thiam Reinier De Ridder in a zonzon rorin a la sak.

Cuhnu ah Aung La N Sang cu voikhat lawng mi thawn an sualaw. Cumicu Mizaan July 30 ah a si ih a thongpi Leandro Ataides cu round 1 nakah a knockout.

An sualaw hnu interview an nei nakah Aung La N Sang cun a taikhap lak saktu Reinier De Ridder hnen ta a cuh saal tum hrih lo thu a mawi zawngin a rel.

“Thatho umlo zetmi sualawknak tivek cu mipi in an lawm lo, an zoh peih lo. Curuangah thatho um zetmi puai picang in tawlrel sak uh. A nih khal a duhduh rak tuah sung ko seh. Tu ahcun mipi hiip zetmi puai manhla pakhatkhat tawlrel uh. One Champion hrang puai hlunghlai zet si hram seh” tiah Aung La N Sang cun a ti.

Leandro Ataides thawn an sualaw ṭheh hnu ih a ṭongsuakmi thu thawn pehpar in MMA khawvel mipi cun Aung La N Sang an fak nasa ih “a fim thlak zet. Reinier De Ridder ka tong duh tibang sehla a dilmi a ngah hngalh ding. Nan, a dinhmun a theiaw ih thinlung thawn taksa thawn a hahdam hnu ah a hrangah ruahsan ding a tamsawn ih mi pakhatkhat thawn sualaw hmasa sehla amah khal za ah za a rinsan aw ding. Keimah dinhmun sisehla Aung La N Sang bangin ka ti ve ding” tiah UFC ihsin cawl la zotu mihminthang Chael Sonnen in a rel a si. (MMAFighting.com)

Leave a Reply

Your email address will not be published. Required fields are marked *