Argentina Palik in Maradona thihdan cungcang Zingzoinak Nei Thok

Leitlun huap bawlungsit thiam hminthang Diego Maradona (kum 60) thih thuthawn pehpar awin Argentina palik in zingzoinak an nei thok tiah Firstpost media in a ngan.

Siivai lam daithlannak ruangih thi mi a si pei maw tiah zingzoinak an nei mi a siih thukhiingtu in Maradona cemralnak inn kiang ih security camera khal zohciangnak nei dingin an dil zo tiah ramsung media ṭhenkhat in an tarlang.

Maradona lawyer Matias Morla khal in ambulances an ko mi a thleng har tuk ruangah rinhlehnak nei vekin a rel ih zingzoinak nei seh la ṭha ding tiah a ti.

Maradona cu November 25 ah a umnak inn Tigre, Buenos Aires, Argentina ah a itthat lan tiah theih a siih, tubaite, autopsy report suak mi ah Lung le Thin lam ciangkuanglo ruangah a thi mi a si ti`n an tarlang.

Thukhiingtu zung lam in “Maradona, Diego. Determination of the cause of death” ti`n case file an ong ih, ṭuanvonei hmin phuang duhlo mipakhat cun AFP hnen ah “inn ah a thi mi a siih a thih thuthawn pehpar awin Death Certificate hminkhentu an umlo ruangah Case kan tuah thok mi a si. Rinhleh umhran le thil hmaanlo um ruangih zingzoimi a si hran lo” a ti.

Asinan, Maradona sungkhat naivai mipakhat cun “Thil hmaan lo a um. Curuangah a kiltu pawl in an tuah dingmi an hnaṭuan dikfel zetin an tuah maw, culole ngaihsak loin an um maw timi kan thei a ṭul”

“Maradona thih ni ah a kiltu nurse in prosecutor hmai ah a thih thuhla a sim. Cuhnu ah a rel uah bet ih TV sung ih a sim dan thawn khal a kalh awknak a um” tiah AFP hnen ah a sim.

Cuih nurse cu Maradona dam lai hmunettu ih ruah mi a siih prosecutor in “a simdan vek a si le a mah hi Maradona dam lai hmunettu a si. A hnaṭuan night shift cem ciah zinglam nazi 6:30 hrawng ah Maradona a dam lai a si” tiah tlawngkai ninga ah a sim a si.

Argentina TV news channel TN simvek a si le tufangah thukhiingtu lam in Maradona toxicological test result an hngak lai a si ti`n FirstPost media in a ngan a si.

Leave a Reply

Your email address will not be published. Required fields are marked *