Ar vulh tum nak Hmunpi cu Khuahlan Thlaan ropi a rak si

Germany : Saxony-Anhalt state ah Phunhnam sang, mi ropi phum nak siding zum um mi Thlanmual ropi hmuhsuah a si.

Ar vulh nak Lo tumpi tuah tum in hmunram thianfainak nei lai ih hmuhsuah mi a si ih Dar bel pakhat cu numi ruh ro paruk in a kulh.

German mithiam pawl in Thlan umdan le a kiangkap ih thil umdan an zoh hnu ah kum 1500 luan hrawng ih phunhnam sang mi ropi phum nak Thlanmual si ding an zum.

Hih hmun ih zingzoinak neirerotu archaeologist Arnold Muhl cun “Phunhnam sang mi ropi lole rank sang zet mi bawi pakhatkhat phum nak siding zum a um. Hih hmun thawn pehpar mi thuanthu theih mi zianghman kan nei lo ih zingzoinak kan nei rero lai”

“Dar bel kulhtu numi paruk ruh a um ih a nupi maw an si? raithawinak ih hmang mi maw an siding tikhal kan thei cianglo. A kiangkap umdanvek a si le hih hmun ih an phum mi cu mi menmen a si lo ding” tiah Germanpost hnen ah a sim ih “Germany ram kum 40 sung san thuanthu ih hmuhsuahnak ropibik a si” a ti.

Dar bel kiangkap ah caw fate, uico, rang 11 ruh tel in rannung ruh tamzet hmuhsuahcih a siih Sui le Ngun khal an hmu.

Archaeologist Arnold Muhl cun “Dar bel cu Thlan 60 kim zik in a kulh. Hih mualpi ah thlalang thawn tuah mi pakan kuum, kawrfual ceimawinak, naam le ralkham kan hmusuak hlei ah Eastern Roman emperor Zeno ih sui paisa 480 hrawng kan hmu”

“Mi ropi tiih zum mi miruak cu kan hmu hrih lo. Dar bel sung ah a ruh vutcaam a um khal si men thei” a ti.

Tulai tectnology thawn ruh ro le puan them (hnipuan hruh mi) zoh nak an nei mi ah AD480 in AD530 kiangkap hrawng ih Rhine tipi tluan ih um Alemanni German phunhnam an si ding zum a um ti`n mithiam pawl cun an sim. (Dailymail)

Leave a Reply

Your email address will not be published. Required fields are marked *

error: hahahahahaha !!