Anonymous Hacker in Minneapolis Police Department Website Siatsuah

Anonymous hacker pawl in George Floyd thihnak thu thawn pehpar in adikmi thuṭhennak nei ding an duh thu Youtube ah an thlah ih George Floyd thihnak hmun ih Minneapolis Police department website khal an hack sak.

Video sung ah cun “Mithat hmang le sualnak phunphun tuah palik cu thilsual tuah ruangih hremtuar mipi vek cekci in hrem ding an si. Asilocun mai duhduh tuah theinak license kan nei tin an duhduh an tuah bet ding.

Kan mah mipi humhimtu ding palik pawl ih eiruknak, mipi hremnak le sual a phunphun an tuah mi cu kan tuar thei nawnlo.

Sual tuah palik cu hremnak pek tengteng ding asi. Abik in officer Chauvin cu mithat case in thuṭhen sak ding a si. Asinan rehsiathlak takin nan nih eiruk sual phunkim tuah pawlkom ih adikmi thuṭhennak nan timi cu kan zum thei nawn lo. Curuangah thil sual nan tuahmi pawl cu leitlun hmuntinkim ah kan than darh thluh ding” tiin sim a si.

Video an thlah ihsin Minneapolis police department website cu ong theih a si nawn lo.

Anonymous Hacker cu tuhlan ihsin Black Lives Matter aupi cangvaihnak ah an tel ṭheu ih 2014 Michael Brown thih thuhla khal ah palik pawl ih retṭhat mi video cu online ah tlangzarhnak an nei ih mawhphurtu hmin khal an rak phuang dah a si.

Leave a Reply

Your email address will not be published. Required fields are marked *