Amazon 30th anniversary gifts bumawknak phen ah ….

Messenger lole WhatsApp ah “Amazon 30th anniversary lawmnak laksawng” timi message kan dong cio ding zum a um. Tulaifang, kawlrammi lakah a lar zetih dong hrih lotu khal an dong rero lai dingih himi gifts an timi thawn pehpar in ziang kan thei ṭul? kan hrangah thil ṭihnung a si maw? timi kan thlir tlang hnik pei.

Miṭhen cun virus a si an ti nan kei ka dongmi le rualpi ṭhenkhat dongmi cu virus a si lo. Bumawknak ciikhat sawn a si.

Messenger ihsin in kuat sawngmi link kan click tikah “Congratulation, kan survey tuah dingah vanṭhatthlak zetin hril na si. Minute malte sungah Huawei Mate 40 Pro 5Gg phone na dong ding.

Himi survey ih teltu cu lawmman kan pe ding. Thusutnak 4 simfiang dingin minute 4 le seconds 30 tikcucaan na nei. Laksawng pek ding mi hi a zat khiahmi a si tikah hmanhmawh aw ti`n ca an ngan ih a tang ah thusutnak sang dingmi an ti lang…. screenshot zoh aw

Screenshot tuahmi kan zoh tikah a lem zia le bumawknak men a si zia a ciang zo. Official sibang sehla amazon tiih an ngan mi khi link vekin click a theih ding. Cuvek thotho in Sign In tiih an ngan mi le bazaar kainak leenglemte khal click theih ding khi a si. Nan, click a theih lo. Cun, minute 4 caankhiah an tuah mi khal 0 a thleng cun a cang nawn lo. Browser kan refresh a si le minute 4 in a thok sal.

Theilo vekin mi an bum tum dan thlun vivo in thusutmi kan sang thluh tikah box tete a lang ih cumi kan hmet tikah Huawei Mate 40 Pro 5G phone lem an ti lang ih a thuai lam ih kan titermi vekin na tuah thluh le phone na ngah ding tiah an tarlang.

Cumi an tuah fialmi cu “midang na rualpi 20 hnen ah share sawng ta aw” ti a si. Voi 20 share hnu ah app download an fial bet ih gift ngah dingin address pakhat ih lut an fial bet. Cuhnu khalah gift cu ngah ti a um cuanglo.

Himihi March thla hrawng khan India ram ah an rak buaipi zetzo ih IT thiamsang pawl cun scam pakhat a si tiah an sim.

UK ram ih IT thiamsang J.S Andrew cun “Cybercriminals pawl in information (personal details) fir an tummi a si. Cumi an fir ngahmi data information hmangin phone call khalin siseh computer pehtlaihnak thawn online ihsin mi an bum vivo. Buainak pipa suakin cozah/palik tvk in ngaihven in online ihsin an thlun vivo cun thilsual tuah lotu information firtuartu riangri a va khih hmuh thlang. Curuangah hivek bumawknak hi ṭihnungzet pakhat a si” a ti.

Ziangvek cin ah kan information an fir thei timi thuthawn pehpar in J.S Andrew cun “Survey kha cu phuahlam ah an hmang menmi a si thei ih ṭihnung hran lo. Aṭihnung cin cu bumtuar vivo in mi thlingthla thei dingih tuahmi an app tivek kan device ih kan install cin ah a si” a ti.

Leave a Reply

Your email address will not be published. Required fields are marked *