Alien nunnak nei mi NEH hawl dingin Mars Leisen par ah Motor le Helicopter an thlah

Mars Leisen par ah Nunnak nei mi neh (signs of alien life) hawl dingih thlah tummi Mars Perseverance rover cu Lei par ihsin 7:50am ET ah tluangten an thlah suak a si. Rover cu ke 6 nei a siih a rual ih an telh cih mi robot helicopter (Mars Helicopter Ingenuity) thawn Cape Canaveral, Florida ihsin rocket in a phur so.

Mars Leisen par ah nunnak nei mi an rak tlangleng dah maw timi le boruak umdan zirnak nei dingin motor (rover) le robot helicopter an thlah mi a siih NASA hoha nak in an thlah mi a si.

Hih mission cu paisa $2.4billion cemliam in an tawlrel ih July 17 ah an thlah tummi a si nan remcang lonak ruangah tui`sun July 30 ah an thlah nak san a si.

Mars Leisenpi cu a liam cia kum 3.5 billion hrawng ah nunnak nei um thei ding khawp in boruak a rak ṭha dah ruangah tuvekin nunnak neh an hawl tumnak a si.

Mars Leisen pan ih an feh danding Lamziin

An fehnak lamtluan a tluang a si le February 18, 2021 hrawng ah Leisen par ah an thleng dingih “Jezero crater” timi hmun ah ṭum in hna an ṭuan thok cih ding. Robot helicopter fate khal in Mars par ih boruak umdan pawl a zir dingih a ra lai dingmi tiikcuu ih motor thlah leh dingmi hrang ah lamziin a rak hawl cia ding.

Mars Perseverance Rover

Mars Leisen par ih nunnak neh hawl tuding Mars Perseverance rover cu Jet Propulsion Laboratory tuah mi a si ih motor par ah camera 23 le microphone 2 an bun.

Mars Perseverance rover

A ruang saulam feet 10 hrawng, feet 9 kau, feet 7 sang a siih duhthusam ih hna a ṭuan thei dingin kum 14 hrawng deih dingmi nuclear battery an hmang. Scientist pawl ih zirnak nei dingmi lungto lak nak ding kut khal a nei ih zirnak dingih lungto dangdang a khawl mi pawl cu kum 2026 ah a hranten an lak saal leh ding.

ref:NASA

Leave a Reply

Your email address will not be published. Required fields are marked *