Aladdin Daawibur hmang in India Dr. Ting Thawng zali Kyat bum tuar

London ih fimthiamnak zir, India ram mi Dr. Laeek Khan cu puithiam tiawtu mi pahnih in paisa ting thawng zali kyat (2.5 crore rupees) an bum ih an bum khawlo mi a thei suak ruangah palik hnen ah a report ih a bumtu mi pahnih cu UP palik in an kai.

Kum 2018 ah pum lam damlonak ruangah Uttar Pradesh ih um nunau pakhat cu a pum a khuai sak ih Siizung in a suak hnu khal ah a inn lam ah Dr. Laeek Khan cun a va vehvai ringring.

Cuih hmum ah puithiam ka si tiawtu Islamuddin thawn an tong aw ih Islamuddin cun magic power ka neih mi thawn billionaire ah ka lo tuah ding a ti.

Islamuddin in puithaim ka si tiawvetu rualpi pakhat a nei ih an pahnih cun “Aladdin ka Chirag” timi Daawibur kan nei tiah Dr. Khan hnen ah an sim.

Cuih Daawibur sung ih um mi khuavang cu DuhṬahNgah a si ih na dil mi hmuahhmuah a lo tuah sak ding ti`n Dr. Khan hnen ah an sim ih Rs.2.5 cr (ting thawng zali kyat luan) thawn an lei ter.

Dr. Khan cun “in mol ter ih Aladdin Daawibur ihsin khuavang suak ngaingai vekin in hmu ter. Ka inn ah Daawibur ka ṭlun tum le ‘vansiatnak in a lo tlak ding’ in ti. A lei nak man khal installment in ka pek thluh zo ih in bum ti ka thei suak sal. Daawibur sung ihsin hung suak vek ih ka hmu mi, khuavang ka ti mi khal cu ka mina nui` pasal Islamuddin a rak si ziar” ti`n Hindi daily Navbharat Times hnen ah a sim.

Dr. Khan cun bum a tuar mi thuhla pawl cu UP, Meerut palik hnen ah a report ih a bum tu Islamuddin le a rualpi Anees cu UP palik in an kai.

Brahampuri Circle Officer (CO) Amit Rai cun “Dr. Khan bum tu Islamuddin le Anees kan kai zo. Tu ah, innteeknu kai danding kan tawlrel lai” a ti.

Leave a Reply

Your email address will not be published. Required fields are marked *